റിയാദ്: സഊദി കിരീടാവകാശിയായി പ്രഖ്യാപിക്കപ്പെട്ട മുഹമ്മദ് ബിന്‍ സല്‍മാന്‍ ബിന്‍ അബ്ദുല്‍ അസീസ് ആലു സഊദിനെ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് അനുമോദിച്ചു. കിരീടാവകാശിയുമായി നേരിട്ട് സംസാരിച്ചാണ് ട്രംപ് അനുമോദനം അറിയിച്ചത്. അടുത്ത കിരീടാവകാശിയായി ഉയര്‍ത്തപ്പെട്ടതിലൂടെ നിലവില്‍ ഇരു രാജ്യങ്ങളും തമ്മിലുള്ള സഹകരണം ശക്തിപ്പെടുത്താന്‍ കിരീടാവകാശം കൂടുതല്‍ പ്രചോദനം ആകട്ടേയെന്നു ട്രംപ് അനുമോദന സന്ദേശത്തില്‍ ആശംസിച്ചു.

'പരസ്പര സഹകരണത്തോടെയുള്ള ലക്ഷ്യങ്ങളും സുരക്ഷാ ഐക്യവും പ്രത്യേകിച്ച് മിഡില്‍ ഈസ്റ്റിലെ സുരക്ഷാ കാര്യങ്ങള്‍ക്കും കൂടുതല്‍ ശക്തി പകരുന്നതാണെന്നു ട്രംപ് പറഞ്ഞതായി വൈറ്റ് ഹൗസ് വൃത്തങ്ങള്‍ പറഞ്ഞു.

നിലവിലെ ഗള്‍ഫ് പ്രതിസന്ധിയെ കുറിച്ചും ഇസ്‌റാഈല്‍ ഫലസ്തീന്‍ പ്രശ്‌നങ്ങളെ കുറിച്ചും ഇരു നേതാക്കളും അഗാധമായി ചര്‍ച്ച ചെയ്തതായും വൈറ്റ് ഹൗസ് വൃത്തങ്ങള്‍ വെളിപ്പെടുത്തി. സഊദിയും അമേരിക്കയും തമ്മില്‍ വളരെ ആഴത്തിലുള്ള സാമ്പത്തിക സഹകരണത്തെ കുറിച്ചും ഇരു നേതാക്കളും ചര്‍ച്ച ചെയ്തു .