ന്യൂഡല്‍ഹി: കേരളത്തിലെ അഞ്ചുമണ്ഡലങ്ങള്‍ക്കൊപ്പം നിയമസഭാ തെരഞ്ഞെടുപ്പ് നടക്കുന്ന ഹരിയാനയും മഹാരാഷ്ട്രയും നാളെ പോളിങ് ബൂത്തിലേക്ക്. രണ്ടിടത്തും ഇന്നലെ പരസ്യപ്രചാരണം അവസാനിച്ചതിനാല്‍ ഇന്ന് നിശബ്ദ പ്രചാരണമാണ് നടക്കുന്നത്.

ഹരിയാനയിലും മഹാരാഷ്ട്രയിലും ബി.ജെ.പിയാണ് ഭരണത്തിലുള്ളത്. പ്രത്യക്ഷമായ ഭരണവിരുദ്ധ വികാരം പോലും വോട്ടാക്കാര്‍ കഴിയാതെ വോട്ടെടുപ്പിനു മുന്‍പേ പരാജയം സമ്മതിച്ച പോലെയായിരുന്നു രണ്ടിടത്തും കോണ്‍ഗ്രസിന്റെ പ്രചാരണം. ലോക്‌സഭാ തിരഞ്ഞെടുപ്പിലെ പരാജയത്തിന്റെയും സംഘടനാ പ്രതിസന്ധിയുടെയും ആഘാതങ്ങളില്‍ നിന്ന് പാര്‍ട്ടി ഇനിയും പുറത്തുകടന്നിട്ടില്ല. സംസ്ഥാനത്തെ ഭരണവിരുദ്ധ വികാരവും വികസനവും സാമ്പത്തിക മാന്ദ്യം പോലുള്ള കേന്ദ്രസര്‍ക്കാരിനെതിരായ വിഷയങ്ങളും എവിടെയും ചര്‍ച്ചയായതേയില്ല. പകരം ജമ്മുകശ്മിരും അതിര്‍ത്തിയും ആണ് പ്രചാരണങ്ങളില്‍ മുഴച്ചുനില്‍ക്കുന്നത്.

കേരളത്തിലുള്‍പ്പെടെ 16 സംസ്ഥാനങ്ങളിലും പുതുച്ചേരിയിലുമായി 51 നിയമസഭാ മണ്ഡലങ്ങളിലും ഇന്ന് ഉപതിരഞ്ഞെടുപ്പു നടക്കുന്നുണ്ട്. ഇതില്‍ 20 എണ്ണം ബി.ജെ.പിയുടെയും 12 എണ്ണം കോണ്‍ഗ്രസിന്റെയും സിറ്റിങ് സീറ്റുകളാണ്. നാലെണ്ണം ജെ.ഡി.യുവിന്റെയും. ഏറ്റവും കൂടുതല്‍ സീറ്റില്‍ (11) ഉപതിരഞ്ഞെടുപ്പുള്ളത് യുപിയിലാണ്. ഇതില്‍ 9 എണ്ണം ബി.ജെ.പിയുടെ സിറ്റിങ് സീറ്റുകളും.

അസമില്‍ നാലിടത്തും വോട്ടെടുപ്പ് നടക്കുകയാണ്. സിക്കിമിലെ 3 സീറ്റിലെ ഫലം സംസ്ഥാന നിയമസഭയുടെ ഭാവിയില്‍ നിര്‍ണായകമാണ്. ആകെ 32 സീറ്റുള്ള നിയമസഭയില്‍ എസ്.കെ.എം 17 സീറ്റിലും എസ്.ഡി.എഫ് 15 സീറ്റിലുമാണ് വിജയിച്ചത്. ഇപ്പോഴത് 16- 13 എന്ന സ്ഥിതിയിലാണ്. മൂന്നു സീറ്റിലും എസ്.ഡി.എഫ് ജയിച്ചാല്‍ 16- 16 എന്ന സ്ഥിതിയാവും. ലോക് ജനശക്തി പാര്‍ട്ടി നേതാവ് രാമചന്ദ്ര പാസ്വാന്‍ അന്തരിച്ച ഒഴിവില്‍ ബിഹാറിലെ സമസ്തിപുര്‍ ലോക്‌സഭാ മണ്ഡലത്തിലും ഇന്നു ഉപതിരഞ്ഞെടുപ്പുണ്ട്.

hariyana maharashtra goes to polling booth tomorrow