പുതുക്കാട്: കെ.എസ്.ആര്‍.ടി.സി ബസ് സര്‍വീസ് ഇടയ്ക്കു വച്ച് അവസാനിപ്പിച്ച കണ്ടക്ടര്‍ക്ക് കോര്‍പറേഷന്‍ പിഴ ശിക്ഷ നല്‍കി. കെ.എസ്.ആര്‍.ടി.സി പുതുക്കാട് സബ് ഡിപ്പോയിലെ കണ്ടക്ടര്‍ അനിലിനും, തൃശൂര്‍ ഡിപ്പോയിലെ ബസ് ക്ലീനര്‍ കൊടകര സ്വദേശി ഹരിക്കുമാണ് 2000 രൂപ വീതം കോര്‍പറേഷന്‍ പിഴ ചുമത്തിയത്. ഈ മാസം 12 നായിരുന്നു വിഷയത്തിനാസ്പദമായ സംഭവം.
പാസ്സ് സംബന്ധമായ വിഷയത്തില്‍ ഹരി, ഭാര്യ, മകന്‍ എന്നിവര്‍ ചാലക്കുടിയില്‍ നിന്നും തൃശൂരിലേക്ക് പോവുകയായിരുന്ന കെ.എസ്.ആര്‍.ടി.സി യുടെ ഓര്‍ഡിനറി ലിമിറ്റഡ് സ്റ്റോപ്പ് ബസ്സില്‍ കൊടകരയില്‍ വച്ച് കണ്ടക്ടര്‍ അനിലുമായി തര്‍ക്കമായി. ഹരിയും കുടുംബവും കൊടകരയില്‍ ഇറങ്ങി എങ്കിലും ഇയാളുമായുണ്ടായ തര്‍ക്കം ചൂണ്ടിക്കാട്ടി കണ്ടക്ടര്‍ അനില്‍ ബസ് പുതുക്കാട് എത്തിയ ഉടനെ സര്‍വീസ് അവസാനിപ്പിച്ചതായി യാത്രക്കാരെ അറിയിക്കുകയായിരുന്നു.  
 24 മണിക്കൂറിനകം പിഴ ഒടുക്കണമെന്നും അല്ലാത്ത പക്ഷം കൂടുതല്‍ കര്‍ശന നടപടി സ്വീകരിക്കേണ്ടിവരുമെന്നും ഇരുവരെയും അറിയിച്ചതായി ഡി.ടി.ഒ വാസുദേവന്‍ പറഞ്ഞു.