ബ്യൂണസ്അയേഴ്‌സ്: അര്‍ജന്റീനയില്‍ നടന്ന കോപ അഡിഡാസ് കപ്പ് ഫുട്‌ബോള്‍ ടൂര്‍ണമെന്റില്‍ അര്‍ജന്റീന ചാംപ്യന്‍മാരായി. എതിരില്ലാത്ത രണ്ട് ഗോളുകള്‍ക്ക് മെക്‌സിക്കോയെ തകര്‍ത്താണ് അര്‍ജന്റീന കിരീടം ചൂടിയത്. മെസ്സിയുടെ അഭാവത്തില്‍ ഇറങ്ങിയ ടീം മികച്ച വിജയമാണ് സ്വന്തമാക്കിയത്.
മെസ്സി ഇല്ലാതെയും ടീമിന് ഒത്തിണക്കത്തോടെ കളിക്കാനും റിസല്‍ട്ടുണ്ടാക്കാനും കഴിയും എന്ന് തെളിയിക്കുന്ന തരത്തിലായിരുന്നു അര്‍ജന്റീനയുടെ പ്രകടനം.
44-ാം മിനുട്ടില്‍ ഫ്യൂനസ് മോറിയാണ് അര്‍ജന്റീനക്ക് വേണ്ടി ആദ്യ ഗോള്‍ നേടിയത്. 83-ാം മിനുട്ടില്‍ ഇസാക് ബ്രിസുവേലയുടെ സെല്‍ഫ് ഗോളിന്റെ ബലത്തിലായിരുന്നു അര്‍ജന്റീന രണ്ട് ഗോളിന്റെ ജയം സ്വന്തമാക്കിയത്. സെര്‍ജിയോ അഗ്യൂറോ, ഗോണ്‍സാലോ ഹിഗ്വെയ്ന്‍, എയ്ഞ്ചല്‍ ഡി മരിയ എന്നീ താരങ്ങളും ടീമിലുണ്ടായിരുന്നില്ല.
യുവന്റസ് താരം പൗലോ ഡിബാല തുടക്കം മുതല്‍ അക്രമിച്ച് കളിച്ചെങ്കിലും ഗോളൊന്നും കണ്ടെത്താനായില്ല. ബുധനാഴ്ച വീണ്ടും അര്‍ജന്റീന മെക്‌സിക്കോയെ നേരിടും.