കാസര്‍കോട്: കനത്ത മഴയെ തുടര്‍ന്ന് ജില്ലയില്‍ വന്‍ നാശനഷ്ടം. കാസര്‍കോട് സബ് ജില്ലാ സ്‌കൂള്‍ കലോത്സവത്തിനായി ബേഡഡുക്ക കൊളത്തൂരിലെ ഗവ. ഹൈസ്‌കൂളില്‍ കെട്ടിയ പന്തല്‍ കാറ്റില്‍ തകര്‍ന്നുവീണു. വിദ്യാര്‍ഥികള്‍ ഓടി രക്ഷപ്പെട്ടതിനാല്‍ വന്‍ ദുരന്തം ഒഴിവായി.
കഴിഞ്ഞ ദിവസമുണ്ടായ ശക്തമായ കാറ്റിലും കലോത്സവ നഗരിയിലെ പന്തല്‍ തകര്‍ന്നിരുന്നു. തുടര്‍ന്ന് പുനഃസ്ഥാപിച്ച പന്തലാണ് ഇന്നലെ വീണ്ടും തകര്‍ന്നത്. ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് ഇന്നലെ അവധിയായിരുന്നെങ്കിലും ജില്ലാ കലക്ടറുടെയും വിദ്യാഭ്യാസ വകുപ്പിന്റെയും അനുമതിയോടുകൂടിയാണ് കലോത്സവം ആരംഭിച്ചത്.
സ്റ്റേജിതര മത്സരങ്ങളാണ് ഇന്നലെ നടന്നത്. കനത്ത മഴയിലും കാറ്റിലും ജില്ലയുടെ വിവിധ ഭാഗങ്ങളില്‍ മരങ്ങള്‍ കടപുഴകി വീണു. നിരവധി വീടുകളും ഭാഗികമായി തകര്‍ന്നിട്ടുണ്ട്. ജില്ലയുടെ വിവിധ ഭാഗങ്ങളില്‍ കടലാക്രമണവും രൂക്ഷമായിട്ടുണ്ട്. ജില്ലയില്‍ ഇന്നും കേന്ദ്ര കാലാവസ്ഥാ നിരീക്ഷണ കേന്ദ്രം ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്.