കല്‍പ്പറ്റ: വയനാട്ടിലെ സര്‍ക്കാര്‍ ആശുപത്രികളില്‍ ജോലി ചെയ്യുന്നതിന് ഡോക്ടര്‍മാര്‍ വിമുഖത കാട്ടുന്നതായി പരാതി. കലക്ടറേറ്റില്‍ ദേശീയ മനുഷ്യാവകാശ കമ്മിഷന്‍ അംഗം ജസ്റ്റിസ് സിറിയക് ജോസഫ് നടത്തിയ സിറ്റിങില്‍ ജില്ലാ മെഡിക്കല്‍ ഓഫിസര്‍ ഡോ.ആശാദേവിയാണ് ഇക്കാര്യം പറഞ്ഞത്.
മാസം 60,000 രൂപ ശമ്പളം വാഗ്ദാനം ചെയ്തിട്ടും വയനാട്ടിലെ സര്‍ക്കാര്‍ ആതുരാലയങ്ങളില്‍ ജോലി ചെയ്യുന്നതില്‍ ഗൈനക്കോളജിസ്റ്റുകള്‍ക്ക് വിമുഖത കാണിക്കുകയാണ്. ഇത് ജില്ലയിലെ വിവിധ സര്‍ക്കാര്‍ ആശുപത്രികളിലെ പ്രസവ ചികിത്സയെ കാര്യമായി ബാധിക്കുന്നുണ്ട്.
ജില്ലയില്‍ ഡോക്ടര്‍മാരുടെ അനുവദിച്ച 201 തസ്തികകളാണുള്ളത്. ഇതില്‍ 152 തസ്തികകളില്‍ നിയമനം നടത്തിയിട്ടുണ്ട്. 49 തസ്തികകള്‍ ഒഴിഞ്ഞുകിടക്കുകയാണ്. സ്‌പെഷ്യലിസ്റ്റ് ഡോക്ടര്‍മാരുടെ അനുവദിച്ച 75 തസ്തികകള്‍ 23 എണ്ണവും ഒഴിഞ്ഞു കിടക്കുകയാണ്.
ഒഴിവുകള്‍ പി.എസ്.സിക്ക് റിപ്പോര്‍ട്ട് ചെയ്‌തെങ്കിലും നിയമനം നടക്കുന്നില്ലെന്നും ഡി.എം.ഒ പറഞ്ഞു. മാനന്തവാടി, വൈത്തിരി, കല്‍പ്പറ്റ, സുല്‍ത്താന്‍ ബത്തേരി എന്നിവിടങ്ങളിലെ ആശുപത്രികളിലായി ദിനവും ആയിരക്കണക്കിന് രോഗികളാണ് ചികിത്സക്കെത്തുന്നത്. ആവശ്യത്തിന് ഡോക്ടര്‍മാരില്ലാത്തത് പൂര്‍ണ ഗര്‍ഭിണികളെ അടക്കം ദുരിതത്തിലാക്കുകയാണ്. വയനാട് പോലുള്ള പിന്നാക്ക ജില്ലകളില്‍ ഡോക്ടര്‍മാരുടെ നിയമനത്തിന് പ്രത്യേക സ്‌കീം രൂപപ്പെടുത്തണമെന്ന് കമ്മിഷന്‍ നിര്‍ദേശിച്ചു. മടക്കിമലയില്‍ വയനാട് മെഡിക്കല്‍ കോളജും പേരിയയില്‍ ശ്രീചിത്തിര ഇന്‍സ്റ്റിറ്റ്യൂട്ടിന്റെ ഉപകേന്ദ്രവും സ്ഥാപിക്കുന്നതിനുള്ള നിര്‍ദേശങ്ങള്‍ നടപ്പിലാക്കിവരുന്നതായി കമ്മിഷനെ കലക്ടര്‍ അറിയിച്ചു.