ന്യൂഡല്‍ഹി: സി.ബി.ഐ തലപ്പത്തെ തര്‍ക്കങ്ങളുടെ തുടര്‍ച്ചയായി ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ ഫോണ്‍ ചോര്‍ത്തിയെന്നു സംശയം. സി.ബി.ഐ ഡി.ഐ.ജി മനീഷ് സിന്‍ഹ സുപ്രിംകോടതിയില്‍ സമര്‍പ്പിച്ച ഹരജിയില്‍ രാകേഷ് അസ്താനയ്ക്കു വേണ്ടി അജിത് ഡോവല്‍ ഇടപെട്ടെന്നു പരാതിപ്പെടുന്നുണ്ട്.
ദേശീയ സുരക്ഷാ ഉപദേഷ്ടാവ് ഡോവലും രാകേഷ് അസ്താനയും തമ്മില്‍ നടത്തിയ ഫോണ്‍ സംഭാഷണം വിശദീകരിച്ചുകൊണ്ടാണ് മനീഷ് സിന്‍ഹ ഹരജി നല്‍കിയിരിക്കുന്നത്. ഡോവലിന്റേതുള്‍പ്പെടെയുള്ള ഫോണ്‍ നമ്പരുകള്‍ നിരീക്ഷണത്തിലായിരുന്നെന്നും ഹരജിയില്‍ പറയുന്നു. രാകേഷ് അസ്താനയ്‌ക്കെതിരേ എഫ്.ഐ.ആര്‍ രജിസ്റ്റര്‍ ചെയ്തപ്പോള്‍ അജിത് ഡോവല്‍ ഇക്കാര്യം അസ്താനയെ അറിയിച്ചിരുന്നതായും ആരോപണമുണ്ട്.
മനീഷ് സിന്‍ഹയുടെ ഹരജിയില്‍ ദേശീയ സുരക്ഷാ ഉപദേഷ്ടാവിനെതിരേയുള്‍പ്പെടെ ഗുരുതരമായ ആരോപണമാണ് ഉന്നയിച്ചിരിക്കുന്നത്. ഇതോടെയാണ് ഫോണ്‍ വിവരങ്ങള്‍ ചോര്‍ത്തിയിട്ടുണ്ടെന്ന സംശയമുയര്‍ന്നത്.
സി.ബി.ഐ ഉദ്യോഗസ്ഥര്‍ ചട്ടങ്ങളൊന്നും പാലിക്കാതെയാണ് ഇതു നടത്തിയതെന്നാണ് സംശയം. ഒരു അന്വേഷണ ഏജന്‍സിക്ക് ആഭ്യന്തര സെക്രട്ടറിയുടെ അനുമതിയില്ലാതെ ഫോണ്‍ വിവരങ്ങള്‍ ചോര്‍ത്താന്‍ സാധിക്കില്ല.