മൂവാററുപുഴ: കാലവര്‍ഷം മൂവാറ്റുപുഴയില്‍ വ്യാപക നാശനഷ്ടം. എം.സി റോഡിലെ ആറൂരില്‍ മണ്ണ് ഇടിഞ്ഞ് റോഡിലേക്ക് വീണു. എം.സി റോഡ് നവീകരണത്തിന്റെ ഭാഗമായി കെ.എസ്.ടി.പി മണ്ണെടുത്ത ആറൂര്‍ ടോപ്പില്‍ കനത്ത മഴയില്‍ മണ്ണ് തിട്ട ഇടിഞ്ഞ് എം.സി.റോഡിലേക്ക് വീണത്. മണ്ണിടിച്ചിലില്‍ കൊറ്റന്‍ചിറ ഷാജുവിന്റെ വീടിന്റെ സംരക്ഷണ ഭിത്തിയും ഇടിഞ്ഞതോടെ വീട് അപകടാവസ്ഥയിലായി.  മണ്ണിടിച്ചിലിനെ തുടര്‍ന്ന് വൃദ്ധ ദമ്പതികളായ കുരുശുമലയില്‍ കുഞ്ഞപ്പന്‍, തങ്കമ്മ എന്നിവരുടെ കൂരയും അപകടാവസ്ഥയിലായി.
പായിപ്രയില്‍ കനത്ത മഴയില്‍ വീടിന്റെ ഭിത്തി ഇടിഞ്ഞ് വൃദ്ധന്  ഗുരുമായി  പരിക്കേറ്റു. പായിപ്ര എനാലിത്തണ്ടേല്‍ കുമാരന്‍ (80)ആണ് പരിക്കേറ്റത്. ഇന്നലെ പുലര്‍ച്ചേ 3ന് ആണ് സംഭവം. ഗുരുതരമായി പരിക്കേറ്റ കുമാരനെ മൂവാററുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. കെട്ടിത്തിന്റെ ഒരു ഭാഗം തകര്‍ന്ന് വീണതുമൂലം നിര്‍ദ്ധനരായ ഈ കുടുംബം എന്തു ചെയ്യണമെന്നറിയാതെ നില്‍ക്കുകയാണ്. വിവരമറിഞ്ഞെത്തിയ മൂവാററുപുഴ തഹസില്‍ദാരുടെ നേതൃത്വത്തില്‍ റവന്യൂ വകുപ്പ് ഉദ്യോഗസ്ഥര്‍ സ്ഥലം സന്ദര്‍ശിച്ച് കെട്ടിടത്തിന്റെ നഷ്ടം തിട്ടപ്പെടുത്തി.
കനത്ത മഴയില്‍ ആസാദ് റോഡില്‍ കിണര്‍ ഇടിഞ്ഞു.ആസാദ്‌റോഡ് എടത്താക്കര പി.എം.അഷറഫിന്റെകിണറാണ്  ചൊവ്വാഴ്ച രാവിലെ 11 മണിയോടെ ഇടിഞ്ഞത്. എം.സി റോഡില്‍ എസ്.വളവില്‍ റോഡരികിലെ മരം ഓടികൊണ്ടിരുന്ന കാറിന് മുകളിലേക്ക് കടപുഴകി വീണതിനെ തുടര്‍ന്ന് കാറിലുണ്ടായിരുന്നവര്‍ അത്ഭുതകരമായി രക്ഷപ്പെട്ടു. ഇതോടെ എം.സി.റോഡില്‍ മണിക്കൂറുകളോളം ഗതാഗതവും സ്തംഭിച്ചു. മൂവാറ്റുപുഴയില്‍ നിന്നും ഫയര്‍ഫോഴ്‌സ് സംഘം എത്തി മരം മുറിച്ച് മാറ്റിയാണ് ഗതാഗതം പുനസ്ഥാപിച്ചത്.
മൂവാറ്റുപുഴയാര്‍ കരകവിഞ്ഞ് ഒഴുകാന്‍ തുടങ്ങിയതോടെയാണ് മൂവാറ്റുപുഴ വെള്ളപൊക്ക ഭീഷണിയിലായി. തുടര്‍ച്ചയായി ശക്തമായ മഴ പെയ്യുന്നതും മലങ്കര ഡാം തുറന്ന് വിട്ടതുമാണ് മൂവാറ്റുപുഴയാറില്‍ വെള്ളമുയരാന്‍ കാരണം.
മൂവാറ്റുപുഴയാറിന്റെ ഇരുകരകളിലേയും താഴ്ന്ന പ്രദേശങ്ങളെല്ലാം തന്നെ വെള്ളത്തിനടിയിലായി. മൂവാറ്റുപുഴയാര്‍ കരകവിഞ്ഞ് ഒഴുകാന്‍ തുടങ്ങിയാല്‍ മൂവാറ്റുപുഴയിലെ താഴ്ന്ന പ്രദേശങ്ങളായ കൊച്ചങ്ങാടി, എട്ടങ്ങാടി, കാള ചന്ത, ഇലാഹിയ നഗര്‍ അടക്കമുള്ള പ്രദേശങ്ങള്‍ വെള്ളത്തിനടിയിലാകും. നഗരത്തിലെ വ്യാപാര സ്ഥാപനങ്ങളിലും വെള്ളം കയറും. മലങ്കര ഡാം തുറന്ന് വിട്ടതോടെ മൂവാറ്റുപുഴയാറിന്റെ ഇരുകരകളിലുമുള്ളവര്‍ക്ക് റവന്യൂ വകുപ്പ് അധികൃതര്‍ ജാഗ്രതാ മുന്നറിയിപ്പും നല്‍കിയിട്ടുണ്ട്.