കണ്ണൂര്‍: ക്ലാസ് റൂം പരിസര ശുചിത്വ വിലയിരുത്തലില്‍ മികച്ച പ്രവര്‍ത്തനങ്ങള്‍ കാഴ്ചവച്ച അങ്കണവാടികള്‍ക്കും സ്‌കൂളുകള്‍ക്കും മൊകേരി പഞ്ചായത്ത് പുരസ്‌കാരങ്ങള്‍ നല്‍കി.
ബ്ലോക്ക് പഞ്ചായത്ത് പ്രസിഡന്റ് എന്‍. അനൂപ് ഉദ്ഘാടനം ചെയ്തു. സ്വച്ഛത ഹി സേവയുടെ ഭാഗമായാണ് മൊകേരി പഞ്ചായത്തിലെ 14 വാര്‍ഡുകളിലെ അങ്കണവാടികള്‍ക്കും സ്‌കൂളുകള്‍ക്കും അവാര്‍ഡ് നല്‍കിയത്.
പഞ്ചായത്തിലെ 18 അങ്കണവാടികളില്‍ മികച്ച ശുചിത്വ അങ്കണവാടിയായി അഞ്ചാം വാര്‍ഡിലെ വള്യായി അങ്കണവാടിയും രണ്ടാമതായി മൂന്നാം വാര്‍ഡിലെ വള്യായി നോര്‍ത്ത് അങ്കണവാടിയെയും തിരഞ്ഞെടുത്തു. പഞ്ചായത്ത് പരിധിയിലെ എട്ട് എല്‍.പി സ്‌കൂളുകളില്‍ മികച്ച പ്രവര്‍ത്തനം കാഴ്ചവച്ച് വാഗ്‌ദേവി വിലാസം എല്‍.പി.എസ് ഒന്നാം സ്ഥാനവും ജി.എല്‍.പി സ്‌കൂള്‍ കൂരാറ രണ്ടാം സ്ഥാനവും കരസ്ഥമാക്കി. യു.പി സ്‌കൂളുകളില്‍ വള്യായി യു.പി സ്‌കൂള്‍ ഒന്നാം സ്ഥാനവും ഈസ്റ്റ് വള്യായി യു.പി.എസ് രണ്ടാം സ്ഥാനവും നേടി. മൊകേരി പഞ്ചായത്ത് പ്രസിഡന്റ് ടി. വിമല അധ്യക്ഷയായി. വി.പി ഷൈനി പുരസ്‌കാരങ്ങള്‍ വിതരണം ചെയ്തു. പി. വത്സന്‍, ടി.കെ കനകം, അബൂബക്കര്‍ ഹാജി, ജയപ്രസാദ്, വി.ഇ.ഒ സമീര്‍ കല്ലിക്കണ്ടി, പി.പി സജിത, വി. ലസിത സംസാരിച്ചു.