കൊച്ചി: എറണാകുളം കലക്ട്‌ട്രേറ്റില്‍ വിവിധ തസ്തികകളില്‍ ജോലി വാഗ്ദാനം നല്‍കി പലരില്‍നിന്നും വന്‍ തുകകള്‍ തട്ടിയയാള്‍ പിടിയില്‍. കോട്ടയം തൃക്കൊടിത്താനം, പൊട്ടസേരി ഭാഗത്ത് പഴയില്‍ വീട്ടില്‍ വിപിന്‍ലാലാണ് കടവന്ത്ര പൊലിസിന്റെ പിടിയിലായത്.
കടവന്ത്ര സ്വദേശിയുടെ പരാതിയിന്‍മേല്‍ കേസ് രജിസ്റ്റര്‍ ചെയ്ത് അന്വഷണം നടത്തിവരുമ്പോള്‍ പ്രതി കടവന്ത്ര ഭാഗത്തുള്ള ആര്‍ഭാട ഫ്‌ളാറ്റില്‍ താമസിച്ചുവരുന്നതിനിടയിലാണ് പൊലിസ് അറസ്റ്റ് ചെയ്തത്.  കോട്ടയം ചങ്ങനാശ്ശേരി, തൃക്കൊടിത്താനം എന്നിവിടങ്ങളില്‍ നിന്നും പലരില്‍ നിന്നായി വന്‍തുകകള്‍ ഇപ്രകാരം കബളിപ്പിച്ചെടുത്തതായി അന്വേഷണത്തില്‍ തെളിഞിട്ടുണ്ട്.
പണം നല്‍കിയ ഉദ്യോഗാര്‍ഥികളെ കലക്ട്രേറ്റില്‍  വിളിച്ചുവരുത്തി ഇതിനായി പ്രത്യേകം തയ്യാറാക്കിയ രജിസ്റ്ററില്‍ ഒപ്പു രേഖപ്പെടുത്തി വ്യജ അപ്പോയ്‌മെന്റ് ലെറ്റര്‍ നല്‍കുകയും അതില്‍പ്പറഞിരിക്കുന്ന തീയ്യതികളില്‍ ജോലിക്ക് ഹാജരാകാന്‍ നിര്‍ദേശിക്കുകയും ചെയ്യുകയാണ് പ്രതിയുടെ രീതി.
കടവന്ത്ര സ്വദേശിയില്‍നിന്നും 266500 രൂപാ വാങ്ങിയെടുത്തശേഷം ഒളിവില്‍ പോയ പ്രതിയെ എറണാകുളം എ.സി.പി ലാല്‍ജി, സെന്‍ട്രല്‍ സി.ഐ വിജയകുമാര്‍, കടവന്ത്ര  എസ്.ഐ ടി ഷാജി, എസ്.സി.പി.ഒ നിഷാദ്, സി.പി.ഒ അനില്‍കുമാര്‍ എന്നിര്‍ ഉള്‍പ്പെട്ട അന്വേഷണസംഘമാണ് പ്രതിയെ അറസ്റ്റ് ചെയ്തത്. പ്രതിയെ കോടതിയില്‍ ഹാജരാക്കി 14 ദിവസത്തേക്ക് റിമാന്‍ഡ് ചെയ്തു.