ആലുവ : ഹാജിമാര്‍ ജീവിതാവസാനം വരെ വിശുദ്ധി പൂര്‍ണമായും കാത്തുസൂക്ഷിക്കണമെന്ന് പാണക്കാട് ഫൈനാസ് അലി ശിഹാബ് തങ്ങള്‍ ഹാജിമാരെ ഉണര്‍ത്തി. പിറന്ന് വീണ കുഞ്ഞിനെപ്പോലെ ഹറമില്‍ നിന്നും ഹജ്ജിന് ശേഷം തിരിക്കുന്ന ഹാജിമാര്‍, ദോഷങ്ങളില്‍ നിന്നും വിട്ടു നില്‍ക്കണമെന്നും സൂക്ഷ്മത കൈമുതലാക്കണമെന്നും അതുവഴി ജീവിത വിജയം കൈവരിക്കണമെന്നും ഉത്‌ബോധിപ്പിച്ചു. മുട്ടം-ചൂര്‍ണ്ണിക്കര ജമാഅത്ത് സംഘടിപ്പിച്ച ഹജ്ജ് യാത്രയയപ്പും സമസ്ത മുശാവറ അംഗമായി തിരഞ്ഞെടുത്ത ഹസന്‍ ഫൈസിയെ ആദരിക്കല്‍ സംഗമവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
മുട്ടം-ചൂര്‍ണ്ണിക്കര ജമാഅത്ത് പ്രസിഡന്റ് ഹാജി അബ്ദുല്‍കരീം അദ്ധ്യക്ഷത വഹിച്ചു. സമസ്ത മുശാവറ അംഗമായി തിരഞ്ഞെടുത്ത ഹസന്‍ ഫൈസിക്ക്  സയ്യിദ് പാണക്കാട് ഫെനാസ് അലി ശിഹാബ് തങ്ങള്‍ ആദരിച്ചു.
സയ്യിദ് ഷറഫുദ്ദീന്‍ തങ്ങളുടെ ദുആയോടെ ആരംഭിച്ച സംഗമത്തില്‍ ജമാഅത്ത് സെക്രട്ടറി പരീത്പിള്ള, ട്രഷറര്‍, സലീം വടാപ്പിള്ളി, വൈസ് പ്രസിഡന്റ്, പി.കെ. കുഞ്ഞുമുഹമ്മദ് ഹാജി, കമ്മിറ്റി അംഗങ്ങളായ അബ്ദുല്‍ഖാദര്‍ മുണ്ടേത്ത്, ബഷീര്‍, ജബ്ബാര്‍, അഷ്‌റഫ് എന്നിവര്‍ പങ്കെടുത്തു. അഷ്‌റഫ് നന്ദി പറഞ്ഞു.