തിരൂരങ്ങാടി: പനിച്ചൂടില്‍ രോഗികള്‍ വിറയ്ക്കുന്നതിനിടെ പ്രതികളുടെ വൈദ്യപരിശോധന ബഹളത്തില്‍ കലാശിച്ചു.  നിരോധിച്ച നോട്ടുകളുമായി തിങ്കളാഴ്ച തിരൂരങ്ങാടി പൊലിസ് പിടികൂടിയ പ്രതികളെ  വൈദ്യ പരിശോധനയ്ക്കായി കൊണ്ടുവന്നപ്പോഴാണ് തിരൂരങ്ങാടി താലൂക്ക് ആശുപത്രിയില്‍ രോഗികള്‍ ബഹളം വെച്ചത്. പെരുന്നാള്‍ ദിനത്തിലും അഞ്ഞൂറോളം രോഗികളാണ് അത്യാഹിത വിഭാഗത്തില്‍ ചികില്‍സ നേടിയത്.
ഒരു ഡോക്ടര്‍ മാത്രമേ ഡ്യൂട്ടിയിലുണ്ടായിരുന്നുള്ളൂ. രോഗികള്‍ വരിനില്‍ക്കുന്നതിനിടെയാണ് പ്രതികളെ കൊണ്ടുവന്നത്. വൈദ്യപരിശോധനയ്ക്ക് ഒരു മണിക്കൂറോളമെടുത്തപ്പോള്‍ വരി നില്‍ക്കുകയായിരുന്ന രോഗികള്‍ ബഹളം വയ്ക്കാന്‍ തുടങ്ങി.
രംഗം  മൊബൈല്‍ ഫോണില്‍ പകര്‍ത്തി ബഹളം വച്ചവര്‍ക്കെതിരേ കേസെടുക്കുമെന്ന് ഭീഷണിപ്പെടുത്തിയത് ആളുകളെ കൂടുതല്‍ ക്ഷുഭിതരാക്കി.
തിരൂരങ്ങാടി, പരപ്പനങ്ങാടി, തേഞ്ഞിപ്പലം എന്നിവിടങ്ങളില്‍ നിന്നുള്ള പ്രതികളെയാണ് വൈദ്യ പരിശോധനയ്ക്കായി തിരൂരങ്ങാടി താലൂക്കാശുപത്രിയില്‍ വൈദ്യപരിശോധനയ്ക്ക്  എത്തിക്കുന്നത്.