മാള: കുഴിക്കാട്ട്‌ശ്ശേരിയില്‍ കുട്ടികളുടെ പാര്‍ക്ക് ഒരുങ്ങുന്നു. ആളൂര്‍ പഞ്ചായത്ത് പാര്‍ക്ക് നിര്‍മാണത്തിനായി അനുവദിച്ച ആദ്യഘട്ട തുക എട്ടു ലക്ഷം രൂപ ഉപയോഗിച്ചാണ് പാര്‍ക്ക് നിര്‍മാണം ആരംഭിച്ചത്. മാള കൊടകര സംസ്ഥാന പാതക്കരികില്‍ കുഴിക്കാട്ട്‌ശ്ശേരിയിലെ വെള്ളാംചിറ കുളത്തിനു സമീപമാണു പാര്‍ക്ക് നിര്‍മിക്കുന്നത്. ഒരേക്കര്‍ വിസ്തൃതിയുള്ള കുളത്തിനരികിലുള്ള പത്തു സെന്റ് സ്ഥലത്താണു പാര്‍ക്ക് നിര്‍മിക്കുന്നത്.
പാര്‍ക്കില്‍ വിശ്രമത്തിനും വിനോദത്തിനുമായി എത്തുന്നവര്‍ക്ക് ഇരിക്കുന്നതിനായി മേല്‍ക്കൂരയോടു കൂടിയ ചാരുബഞ്ചുകളുടെ നിര്‍മാണം പുരോഗമിക്കുകയാണ്. കൂടാതെ ഇവിടെ ടൈല്‍ വിരിച്ചു മനോഹരമാക്കാനും പദ്ധതിയുണ്ട്. കുട്ടികള്‍ക്കു വിനോദ ഉപകരണങ്ങളും സ്ഥാപിക്കും.
രണ്ടാംഘട്ട ഫണ്ട് ഈ വര്‍ഷത്തില്‍ അനുവദിക്കുമെന്നു വാര്‍ഡ് മെംബര്‍ അറിയിച്ചു. അവശേഷിക്കുന്ന നിര്‍മാണ പ്രവര്‍ത്തനങ്ങള്‍ക്കാവശ്യമായ ഫണ്ട് മുഴുവന്‍ പഞ്ചായത്തു നല്‍കുമെന്നും മെംബര്‍ പറഞ്ഞു.
എല്ലാ കാലത്തും ജലസമൃദ്ധമായ വിശാലമായ വെള്ളാംചിറ കുളത്തിലെ പായലും ചണ്ടിയും നീക്കി നീന്തല്‍ പരിശീലനത്തിനു ഉപയോഗിക്കാനും പദ്ധതിയുണ്ട്. കൂടാതെ ഈ ജലാശയത്തില്‍ ഉല്ലാസ ജലയാത്രക്കായി ഫൈബര്‍ ബോട്ടുകള്‍ വാങ്ങുന്ന കാര്യവും പരിഗണയിലുണ്ടെന്ന് ഗ്രാമപഞ്ചായത്ത് മെംബര്‍ അറിയിച്ചു.