അഹമ്മദാബാദ്: ഗുജറാത്ത് ബി.ജെ.പി മുഖ്യമന്ത്രി വിജയ് രൂപാനിക്ക് രാജകീയമായി സഞ്ചരിക്കാനായുള്ള ആഡംബര വിമാനം ദിവസങ്ങള്‍ക്കുള്ളില്‍ സംസ്ഥാനത്തെത്തും. ഒരു യാത്രയില്‍ 7000 കിലോ മീറ്റര്‍ ദൂരം വരെ പറക്കാന്‍ കഴിയുന്ന ഈ വിമാനത്തിന്റെ ചിലവ് 191 കോടി രൂപയാണ്.മുഖ്യമന്ത്രിയെ കൂടാതെ ഗവര്‍ണര്‍, ഉപമുഖ്യമന്ത്രി തുടങ്ങിയ വി.വി.ഐ.പിക്കള്‍ക്ക് കൂടി ഉപയോഗിക്കാന്‍ വേണ്ടിയാണ് ഇത്രയും ചിലവ് സഹിച്ച് വിമാനം വാങ്ങുന്നതെന്നാണ് അധികൃതര്‍ നല്‍കുന്ന വിശദീകരണം.

ഇരട്ട എഞ്ചിനോട് കൂടിയ ബോംബാര്‍ഡിയര്‍ ചലഞ്ചര്‍ 650 വിഭാഗത്തില്‍പ്പെട്ട വിമാനമാണിത്. 12 പേര്‍ക്കാണ് ഇതില്‍ യാത്രചെയ്യാനാവുക. കഴിഞ്ഞ 20 വര്‍ഷമായി ബീച്ച്ക്രാഫ്റ്റ് സൂപ്പര്‍ കിംഗ് ഇനത്തിലുള്ള വിമാനമാണ് സംസ്ഥാനം ഉപയോഗിച്ചിരുന്നത്. മണിക്കൂറില്‍ 870 കിലോമീറ്ററാണ് ഇതിന്റെ വേഗത. ഇതിനെയെല്ലാം കവച്ചുവക്കുന്ന തരത്തിലാകും പുതിയ ആഡംബര വിമാനത്തിന്റെ പെര്‍ഫോമന്‍സ്. വിമാനം ഗുജറാത്തില്‍ എത്തിക്കുന്നതിനായുള്ള എല്ലാ നടപടിക്രമങ്ങളും അവസാനഘട്ടത്തിലാണെന്ന് അധികൃതര്‍ വ്യക്തമാക്കി.

അതേസമയം വിമാനം സംസ്ഥാനത്ത് എത്തിച്ചാലും വീണ്ടും രണ്ട് മാസം കൂടി കഴിഞ്ഞാലെ യാത്ര ആരംഭിക്കാനാകൂ എന്ന് ഡയറക്ടര്‍ ഓഫ് സിവില്‍ ഏവിയേഷന്‍ ക്യാപ്റ്റന്‍ അജയ് ചൗഹാന്‍ പറഞ്ഞു. കസ്റ്റംസില്‍ നിന്നും നിരവധി അനുമതികള്‍ ലഭിക്കേണ്ടതിനാലാണിത്.