കല്ലമ്പലം: സ്‌കൂള്‍ വിദ്യാര്‍ഥിനിയായ ദലിത് ബാലികയെ ലൈംഗികമായി പീഡിപ്പിച്ചയാള്‍ പിടിയില്‍. കിളിമാനൂര്‍ അയ്യപ്പന്‍കാവ് നഗര്‍ പഴവൂര്‍കോണത്തുവീട്ടില്‍ ആര്‍. ചന്ദ്രശേഖരന്‍നായരെയാണ് കിളിമാനൂര്‍ പൊലിസ് പിടികൂടിയത്.
വയറിങ് പ്ലംബിങ് തൊഴിലാളിയായ ചന്ദ്രശേഖരന്‍ നായര്‍ ഇക്കഴിഞ്ഞ ശിശുദിനത്തില്‍ കിളിമാനൂര്‍ പ്രാന്തപ്രദേശത്തിലെ ഒരു അപ്പര്‍പ്രൈമറി വിദ്യാലയത്തില്‍ വയറിങ് ജോലിക്കായെത്തുകയും സ്‌കൂളിലെ ഏഴാം ക്ലാസ് വിദ്യാര്‍ഥിനിയായ ദലിത് പെണ്‍കുട്ടിയെ ലൈംഗികമായി ഉപദ്രവിക്കുകയുമായിരുന്നു.
വിദ്യാര്‍ഥിനി വിവരം സ്‌കൂള്‍ പ്രഥമാധ്യാപികയെ അറിയിക്കുകയും പ്രഥമാധ്യാപിക പൊലിസില്‍ പരാതിപ്പെടുകയുമായിരുന്നു. തുടര്‍ന്ന് പൊലിസ് നടത്തിയ അന്വേഷണത്തിലൊടുവില്‍ പ്രതി കസ്റ്റഡിയിലാവുകയായിരുന്നു.