തിരുവനന്തപുരം: സംസ്ഥാനത്തുടനീളം സഞ്ചരിച്ച് കാംപസുകളിലെ സംരംഭകര്‍ക്ക് മാര്‍ഗനിര്‍ദേശം നല്‍കി കേരള സ്റ്റാര്‍ട്ടപ് മിഷന്‍ (കെ.എസ്.യു.എം) സംഘടിപ്പിച്ച നൂതനമായ സ്റ്റാര്‍ട്ടപ് യാത്ര എണ്‍പതോളം പുത്തന്‍ ആശയങ്ങളുമായി ടെക്‌നോ പാര്‍ക്കില്‍ സമാപിച്ചു.
ഈ ആശയങ്ങള്‍ അവതരിപ്പിക്കാന്‍ ഇരുനൂറോളം യുവജനങ്ങള്‍ ഒത്തുചേരുന്ന സ്റ്റാര്‍ട്ട് അപ് ഗ്രാന്‍ഡ് ഫിനാലെക്ക് നാളെ തുടക്കമാകും. രണ്ടു ദിവസങ്ങളിലായി ടെക്‌നോ പാര്‍ക്കിലാണ് ഗ്രാന്‍ഡ് ഫിനാലെ നടക്കുക. നാളെ ഇവര്‍ക്ക് വിദഗ്ധരുടെ പാനല്‍ മാര്‍ഗനിര്‍ദേശങ്ങളും ഉപദേശങ്ങളും നല്‍കും. 27ന് നിക്ഷേപങ്ങളിലേക്ക് വഴി തേടിയുള്ള അവതരണമാണ്. അന്നുതന്നെ ഏറ്റവും മികച്ച ആശയങ്ങളെ തിരഞ്ഞെടുക്കും. 10 ലക്ഷം രൂപയാണ് വിജയികള്‍ക്കായി മാറ്റിവച്ചിട്ടുള്ളത്.
വൈകിട്ട് മൂന്നിനാണ് സമാപന ചടങ്ങ്. സ്റ്റാര്‍ട്ടപ് സംരംഭങ്ങളെ പ്രോത്സാഹിപ്പിക്കാനായി കേന്ദ്ര സര്‍ക്കാര്‍ പ്രഖ്യാപിച്ച പദ്ധതിയായ സ്റ്റാര്‍ട്ടപ് ഇന്ത്യയുടെ സഹകരണത്തോടെയാണ് കെ.എസ്.യു.എം യാത്ര നടത്തിയത്.