ന്യൂഡല്‍ഹി: ബാബരി മസ്ജിദ് നിലനിന്ന ഭൂമി രാമക്ഷേത്രം നിര്‍മിക്കാനായി വിട്ടുകൊടുത്ത് സുപ്രിംകോടതി പുറപ്പെടുവിച്ച ഉത്തരവ് ആരാണ് എഴുതിയതെന്ന് അവ്യക്തം. സാധാരണ ഉത്തരവ് എഴുതിയ ജഡ്ജിയുടെ പേര് അവസാനഭാഗത്ത് എഴുതിവയ്ക്കുന്നതാണ് പതിവ്. എന്നാല്‍, ഇന്നലെ ഭരണഘടനാ ബെഞ്ച് പുറപ്പെടുവിച്ച 1045 പേജുള്ള വിധിയില്‍ പക്ഷേ അതെഴുതിയ ജഡ്ജിയുടെ പേര് പരമാര്‍ശിക്കുന്നേ ഇല്ല. ബെഞ്ചിന് വേണ്ടി വിധി എഴുതുന്ന ജഡ്ജിയുടെ പേര് അതില്‍ ഉണ്ടാവുക എന്ന എസ്റ്റാബ്ലിഷ്ഡ് പ്രാക്ട്ടീസിന് വിരുദ്ധവും വിചിത്രവും ആണിത്. വിധിയില്‍ ഹൈന്ദവവിശ്വാസ പ്രകാരം എങ്ങനെയാണ് ഭൂമി രാമന്റെ ജന്മസ്ഥലം ആയതെന്ന് വിശദീകരിക്കുന്ന 116 പേജ് വരുന്ന അനുബന്ധവും ഉണ്ട്. വിശ്വാസ സംബന്ധമായ രേഖകളും മൊഴികളും ഉദ്ധരിച്ചാണ് പള്ളി നിര്‍മ്മിച്ച സ്ഥലം തന്നെയാണ് രാമന്റെ ജന്മസ്ഥലവും എന്ന് അനുബന്ധ വിധി പറയുന്നത്. 929ാം പേജിലാണ് അനുബന്ധത്തെ കുറിച്ച് പറയുന്നത്. എന്നാല്‍, ഈ അനുബന്ധം ആരാണ് എഴുതിയതെന്നും ഉത്തരവില്‍ പരാമര്‍ശിക്കുന്നില്ല.