ദുബൈ: യു.എ.ഇയില്‍ ഇന്നലെ രാവിലെ അതിശക്തമായ മഴ പെയ്തു. സഊദിക്കും കുവൈത്തിനും പിന്നാലെയാണ് അതിശക്തമായ മഴ ഇന്നലെ യു.എ.ഇയില്‍ ലഭിച്ചത്. റോഡുകളിലുണ്ടായ വെള്ളക്കെട്ടില്‍ ഗതാഗതം സ്തംഭിച്ചു. മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്. വടക്കന്‍ മലയോര പ്രദേശങ്ങളായ അല്‍ജീര്‍, ഷാം, ഖോര്‍ ഖോര്‍ എന്നിവിടങ്ങളിലെ കനാലുകള്‍ നിറഞ്ഞൊഴുകി. തെക്കു കിഴക്കന്‍ പ്രദേശങ്ങളിലെ ഗ്രാമങ്ങളിലും മഴ ലഭിച്ചു. എന്നാല്‍, പ്രധാന നഗരപ്രദേശങ്ങളില്‍ തണുത്ത കാറ്റും ചാറ്റല്‍ മഴയുമാണ് കൂടുതലും അനുഭവപ്പെട്ടത്. വടക്ക് കിഴക്കന്‍ മേഖലകളില്‍ മഴ തുടരാന്‍ സാധ്യതയുണ്ട്. മഴയില്‍ ദൂരക്കാഴ്ച കുറയുന്നതിനാല്‍ വാഹനമോടിക്കുന്നവര്‍ ജാഗ്രത പാലിക്കണമെന്ന് മുന്നറിയിപ്പ് നല്‍കിയിട്ടുണ്ട്. അതിശക്തമായ മഴക്ക് പിന്നാലെ നിരവധി വാഹനാപകടങ്ങളാണ് ഇന്നലെ യു.എ.ഇയില്‍ റിപ്പോര്‍ട്ട് ചെയ്യപ്പെട്ടത്. ഇന്നലെ രാവിലെ ദുബൈയില്‍ മാത്രം 147 വാഹനാപകടങ്ങളുണ്ടായെന്ന് പൊലിസ് അറിയിച്ചു.