കോഴിക്കോട്: സുന്നി യുവജന സംഘം ജില്ലാ കമ്മിറ്റി കര്‍മശ്രേഷ്ഠാ പുരസ്‌കാരം നല്‍കുന്നു. മത സാമൂഹിക സാംസ്‌കാരിക ജീവകാരുണ്യ രംഗത്തു ജില്ലയില്‍ മികച്ച സേവനം നടത്തിയ വ്യക്തിക്കാണ് പുരസ്‌കാരം നല്‍കുന്നത്. വ്യക്തിത്വം, ത്യാഗം, സേവനം, ആത്മാര്‍ഥത, സമര്‍പ്പണം എന്നീ മാനദണ്ഡങ്ങള്‍ പരിഗണിച്ചാണ് അവാര്‍ഡ്. ജേതാവിനെ കണ്ടെത്താന്‍ പ്രവര്‍ത്തക സമിതി യോഗം ഏഴംഗ ജൂറി സമിതിക്ക് രൂപം നല്‍കി. നവാസ് പൂനൂര്‍ (ചെയര്‍മാന്‍), ടി.പി ചെറൂപ്പ, സി.എച്ച് മഹ്മൂദ് സഅദി, നാസര്‍ ഫൈസി കൂടത്തായി, കെ. മോയിന്‍കുട്ടി മാസ്റ്റര്‍, മലയമ്മ അബൂബക്കര്‍ ഫൈസി, കെ.പി കോയ എന്നിവരാണ് ജൂറി അംഗങ്ങള്‍. പുരസ്‌കാരം മാര്‍ച്ചില്‍ സമര്‍പ്പിക്കും.
മുഹമ്മദ് നബി (സ) അനുപമ വ്യക്തിത്വം എന്ന പ്രമേയത്തില്‍ എസ്.വൈ.എസ് സംസ്ഥാന കമ്മിറ്റി നടത്തുന്ന മീലാദ് കാംപയിനിന്റെ ഭാഗമായി ജില്ലാതല മീലാദ് സെമിനാര്‍ ഡിസംബര്‍ അഞ്ചിന് ഉച്ചയ്ക്ക് രണ്ടിന് കോഴിക്കോട് സുപ്രഭാതം ഓഡിറ്റോറിയത്തില്‍ നടക്കും. ഹമീദ് ഫൈസി അമ്പലക്കടവ്, അബ്ദുസ്സമദ് പൂക്കോട്ടൂര്‍, മുസ്തഫ അഷ്‌റഫി കക്കുപ്പടി എന്നിവര്‍ വിഷയങ്ങള്‍ അവതരിപ്പിക്കും.
ഷാര്‍പ്പ് ഫോര്‍ട്ടീന്‍ ഫോര്‍ട്ടി എന്ന പ്രമേയത്തില്‍ ജനുവരിയില്‍ മണ്ഡലം തലങ്ങളില്‍ പ്രതിനിധി സംഗമങ്ങള്‍ നടത്താന്‍ യോഗം തീരുമാനിച്ചു. ബേപ്പൂര്‍ ജനുവരി 1, തിരുവമ്പാടി 19, എലത്തൂര്‍ 12, ബാലുശ്ശേരി 6, നാദാപുരം 13, കൊയിലാണ്ടി 5, വടകര 12, കുറ്റ്യാടി 2, കോഴിക്കോട് സിറ്റി 5, പേരാമ്പ്ര 19, കുന്ദമംഗലം 12, കൊടുവള്ളി 24 ന് നടക്കും.
യോഗത്തില്‍ പ്രസിഡന്റ് സി.എച്ച് മഹ്മൂദ് സഅദി അധ്യക്ഷനായി. നാസര്‍ ഫൈസി കൂടത്തായി സ്വാഗതവും അഷ്‌റഫ് ബാഖവി ചാലിയം നന്ദിയും പറഞ്ഞു.