അന്തിക്കാട്: പ്രളയം കഴിഞ്ഞ് നൂറു ദിവസമായിട്ടും വീടു തകര്‍ന്നവര്‍ നഷ്ടപരിഹാരത്തിനായി നെട്ടോട്ടമൊടുന്നു. മേഖലയിലെ തകര്‍ന്ന വീടുകളില്‍ വില്ലേജ്, പഞ്ചായത്ത് അധികൃതരെത്തി നഷ്ടപരിഹാര കണക്കെടുപ്പ് നടത്തിയിട്ട് മൂന്നു മാസത്തോളമായി. പിന്നീട് തുടര്‍ നടപടികളൊന്നും ഉണ്ടാകാത്തതാണ് ഇവരെ ആശങ്കയിലാക്കുന്നത്. തകര്‍ന്ന വീടുകള്‍ പൊളിച്ചുനീക്കിയാല്‍ നഷ്ടപരിഹാരം ലഭിക്കില്ലെന്ന പ്രചാരണം വ്യാപകമായതോടെ വീടുകള്‍ തകര്‍ന്ന അവസ്ഥയില്‍ തന്നെ നില്‍ക്കുകയാണ്.
വീടു തകര്‍ന്നവരില്‍ ഭൂരിഭാഗവും വാടക വീടുകളിലും ചിലര്‍ ബന്ധുവീടുകളിലുമാണ് താമസിക്കുന്നത്. വിവിധ ഓഫിസുകള്‍ കയറിയിറങ്ങി അധികൃതര്‍ ആവശ്യപ്പെട്ട രേഖകള്‍ മുഴുവന്‍ സമര്‍പ്പിച്ചിട്ടും നഷ്ടപരിഹാരം വൈകുന്നതില്‍ പ്രതിഷേധം വ്യാപകമായി. നഷ്ടപരിഹാരം എന്ന് ലഭിക്കുമെന്ന് ആര്‍ക്കും പറയാന്‍ കഴിയാത്ത സ്ഥിതിയാണ് നിലവിലുള്ളത്. നഷ്ടപരിഹാരത്തെക്കുറിച്ചന്വേഷിച്ച് വില്ലേജ് ഓഫിസുകളിലെത്തുന്നവരോട് താലൂക്ക് ഓഫിസുകളെ സമീപിക്കാനാണ് അധികൃതര്‍ ആവശ്യപ്പെടുന്നത്. എന്നാല്‍ താലൂക്ക് ഓഫിസുകളില്‍ നിന്നും ഇവര്‍ക്ക് വ്യക്തമായ മറുപടി ലഭിക്കുന്നില്ല. വീടു തകര്‍ന്നവര്‍ക്ക് ലക്ഷകണക്കിന് രൂപയുടെ നഷ്ടമാണ് ഉണ്ടായിട്ടുള്ളത്. വീടു തകര്‍ന്നവര്‍ക്ക് നഷ്ടപരിഹാരം ഉടന്‍ ലഭ്യമാക്കാന്‍ അധികൃതര്‍ നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു.