കൊണ്ടോട്ടി: ന്യൂനപക്ഷ മതവിഭാഗങ്ങളിലെ വിധവകള്‍ക്കും വിവാഹമോചിതര്‍ക്കുമുള്ള ഇമ്പിച്ചിബാവ ഭവന പദ്ധതി സര്‍ക്കാര്‍ നിര്‍ത്തലാക്കി. രണ്ടുവര്‍ഷമായി അപേക്ഷകള്‍ സ്വീകരിക്കാതെ പദ്ധതിയെ ലൈഫ്മിഷനില്‍ ലയിപ്പിച്ചതോടെയാണ് അര്‍ഹരായ പലര്‍ക്കും വീടുകള്‍ ലഭിക്കുന്നില്ലെന്ന ആക്ഷേപം ഉയര്‍ന്നിരിക്കുന്നത്.

ലൈഫ് മിഷന്‍ ഭവന പദ്ധതിയില്‍ പുതിയ വീടുകള്‍ക്കും, സര്‍ക്കാര്‍ ഫണ്ട് ലഭിച്ചിട്ടും പാതിവഴിയിലായ വീടുകള്‍ക്കുമാണ് ഫണ്ട് നല്‍കുന്നത്. എന്നാല്‍ ഇമ്പിച്ചിബാവ ഭവന പദ്ധതിയില്‍ വീട് നിര്‍മാണത്തിനും, വീടുകളുടെ അറ്റകുറ്റപ്പണികള്‍ക്കും സഹായം ലഭിച്ചിരുന്നു. ലൈഫ്മിഷനില്‍ ലയിപ്പിച്ചതോടെ ഈ ആനുകൂല്യം ഇല്ലാതായി.

ന്യൂനപക്ഷ വിഭാഗത്തിലെ വിധവ, വിവാഹബന്ധം വേര്‍പ്പെടുത്തുകയോ, ഉപേക്ഷിക്കുയോ ചെയ്ത സ്ത്രീകള്‍ എന്നിവര്‍ക്കാണ് ഇമ്പിച്ചിബാവ ഭവന പദ്ധത വഴി ആനുകൂല്യം ലഭിച്ചിരുന്നത്. ബി.പി.എല്‍ വിഭാഗത്തിനും മാനസിക-ശാരീരിക വൈകല്യങ്ങള്‍ നേരിടുന്നവര്‍ക്കും മുന്‍ഗണനയും ലഭിച്ചിരുന്നു. 2016-17 വര്‍ഷത്തില്‍ മാത്രം 12,399 അപേക്ഷകളാണ് പുതിയ വീടുകള്‍ക്ക് ലഭിച്ചിരുന്നത്. 1240 വീടുകള്‍ അനുവദിക്കുകയും ചെയ്തു. 

2017-18 വര്‍ഷത്തില്‍ 3608 പുതിയ വീടുകള്‍ക്കുള്ള അപേക്ഷകളും, 4591 അപേക്ഷകള്‍ വീടുകളുടെ പുനരുദ്ധാരണത്തിനും ലഭിച്ചിരുന്നു. ഇതില്‍ 1798 പേര്‍ക്കും പുതിയ വീടുകളും 1000 വീടുകള്‍ പുനരുദ്ധാരണവും നടത്തി. 

500 ലക്ഷമാണ് അവസാനമായി സര്‍ക്കാര്‍ അനുവദിച്ചത്. അപേക്ഷകള്‍ കൂടുതലും ലഭിച്ചത് മലപ്പുറം ജില്ലയില്‍ നിന്നായിരുന്നു. 

കൂടുതല്‍ പേര്‍ക്കും ഭവനങ്ങളും ഭവനങ്ങളുടെ പുനരുദ്ധാരണത്തിനും സഹായം ലഭിച്ചതും മലപ്പുറം ജില്ലക്കായിരുന്നു.

വാതിലുകളും ജനലുകളും ഉറപ്പുള്ള മേല്‍ക്കൂരയുമില്ലാത്ത വീടുകളുടെ പുനരുദ്ധാരണത്തിനുമായി അരലക്ഷം രൂപയാണ് ധനസഹായമായി നല്‍കിയിരുന്നത്. എല്ലാവര്‍ക്കും വീട് എന്ന ലൈഫ് മിഷന്‍ ഭവന പദ്ധതി ആരംഭിച്ചതോടെയാണ് ഇമ്പിച്ചിബാവ ഭവന പദ്ധതിക്ക് അപേക്ഷകള്‍ സ്വീകരിക്കാതെയായത്. നാലുഘട്ടങ്ങളിലായി നടക്കുന്ന ലൈഫ് മിഷനില്‍ സ്വന്തമായി ഭൂമിയുള്ളവര്‍, ഭൂമിയില്ലാത്തവര്‍ തുടങ്ങിയവ പരിശോധിച്ചാണ് വീടുകള്‍ നല്‍കുന്നത്. എന്നാല്‍ പുനരുദ്ധാരണത്തിന് ഫണ്ട് അനുവദിക്കുന്നുമില്ല.