കൊളത്തൂര്‍: ബസ് യാത്രക്കിടെ വൃദ്ധയുടെ മാല മോഷ്ടിച്ച നാടോടി സ്ത്രീയെ കൊളത്തൂര്‍ പൊലിസ് അറസ്റ്റ് ചെയ്തു. വൃദ്ധയുടെ പരാതിയില്‍ പൂക്കാട്ടിരിയില്‍ താമസമാക്കിയ കോയമ്പത്തൂര്‍ ഉക്കടം സ്വദേശിനിയായ മഹാലക്ഷ്മി(27) എന്ന നാടോടി സ്ത്രീയാണ് കൊളത്തൂര്‍ പൊലിസ് പിടികൂടിയത്. കഴിഞ്ഞദിവസം ഉച്ചയോടെ പാങ്ങ് ചേണ്ടിയില്‍ വച്ചാണ് സംഭവം. ബസ് യാത്രക്കിടെ വൃദ്ധയുടെ രണ്ടര പവനോളം തൂക്കം വരുന്ന മാല തന്ത്രപരമായി കൈക്കലാക്കി ബസില്‍ നിന്നും ഇറങ്ങി ഓട്ടോയില്‍ കയറി രക്ഷപ്പെടുകയായിരുന്നു. ബസ് യാത്രക്കാരായ വിദ്യാര്‍ഥികളുടെ സംയോചിത ഇടപെടല്‍ മൂലമാണ് പ്രതി നാട്ടുകാരുടെ പിടിയില്‍ അകപ്പെട്ടത്. ഓട്ടോറിക്ഷയില്‍ കയറി രക്ഷപ്പെടുകയായിരുന്ന നാടോടി സ്ത്രീയെ നാട്ടുകാര്‍ പിന്‍തുടരുകയായിരുന്നു. നാടോടി സ്ത്രീ കാവതിക്കുളത്തു വച്ച് ഓട്ടോയില്‍ നിന്നും ചാടി രക്ഷപ്പെടുന്നതിനിടെ നാട്ടുകാര്‍ പിടികൂടുകയും പൊലിസിലേല്‍പ്പിച്ചു. പെരിന്തല്‍മണ്ണ കോടതിയില്‍ ഹാജറാക്കിയ പ്രതിയെ റിമാന്‍ഡ് ചെയ്തു.