തേഞ്ഞിപ്പലം: കടലുണ്ടിപ്പുഴയില്‍ വലയെറിഞ്ഞപ്പോള്‍ യുവാക്കള്‍ക്ക് ലഭിച്ചത് ഭീമന്‍ മത്സ്യം. തേഞ്ഞിപ്പലം ഇരുമ്പോത്തിങ്ങല്‍ കടവിനടുത്ത് പുഴയില്‍ നിന്നാണ് കോര ഇനത്തില്‍പെട്ട വലിയ മത്സ്യം മീന്‍പിടിത്തക്കാരുടെ വലയിലകപ്പെട്ടത്. 'നരിമീന്‍' എന്നും ഇതിന് പേരുണ്ട്. പ്രദേശത്തുകാരായ ശാഫി, കുട്ടന്‍, അദുല്‍ എന്നിവരാണ് ഈ മഹാഭാഗ്യത്തിനുടമകള്‍.
കഴിഞ്ഞ ദിവസം വൈകിട്ടാണ് ഭീമന്‍ മത്സ്യം ഇവരുടെ വലയില്‍ കുടുങ്ങിയത്. പതിനഞ്ച് കിലോ തൂക്കമാണുള്ളത്. മത്സ്യം ഫറോക്കില്‍ നിന്നെത്തിയ ആവശ്യക്കാര്‍ക്ക് ആറായിരം രൂപയ്ക്ക് വില്‍പന നടത്തി. ഇരുമ്പോത്തിങ്ങല്‍ ഭാഗത്തുനിന്ന് ആദ്യമായിട്ടാണ് ഇത്രയും വലിയ മീന്‍ ലഭിക്കുന്നത്. മാതാപുഴ, തയ്യിലക്കടവ്, മണ്ണട്ടാംപാറ ഭാഗങ്ങളില്‍ നിന്നും നേരത്തേ ഇത്തരത്തിലുള്ള ഭീമന്‍ മത്സ്യങ്ങള്‍ ലഭിച്ചിരുന്നതായി നാട്ടുകാര്‍ സാക്ഷ്യപ്പെടുത്തുന്നു.