ന്യൂഡല്‍ഹി: കഴിഞ്ഞ അഞ്ചു വര്‍ഷത്തിനിടയില്‍ മാവോയിസ്റ്റ് ആക്രമണത്തില്‍ കേരളത്തിലെ പൊലിസ് ഉദ്യോഗസ്ഥര്‍ ആരും കൊല്ലപ്പെട്ടിട്ടില്ലെന്നും പൊലിസ് ഉദ്യോഗസ്ഥര്‍ക്ക് മുറിവേറ്റിട്ടില്ലെന്നും ലോക്‌സഭയില്‍ എന്‍.കെ പ്രേമചന്ദ്രനെ ആഭ്യന്തര സഹമന്ത്രി ജി. കിഷന്‍ റെഡ്ഡി അറിയിച്ചു. 

മാവോയിസ്റ്റ് ആക്രമണത്തെ കുറിച്ചുള്ള ചോദ്യത്തിന് മറുപടിയായിട്ടാണ് വിവരം നല്‍കിയത്.  2016, 2019 കാലയളവില്‍ 7 മാവോയിസ്റ്റുകള്‍ കൊല്ലപ്പെട്ടു. ഇതില്‍ രണ്ടുപേര്‍ 2016 ലും അഞ്ചുപേര്‍ 2019 ലുമാണ് കൊല്ലപ്പെട്ടത്. 2014 മുതല്‍ 2019 ഒക്ടോബര്‍ 31 വരെ 26 ഏറ്റുമുട്ടലുകളും 9 വെടിവയ്പുകളും ഉണ്ടായി. 6 വെടിവയ്പുകള്‍ 2016, 2019 കാലയളവിലാണ് ഉണ്ടായത്. കേന്ദ്ര ആഭ്യന്തര മന്ത്രാലയം രാജ്യത്തിന്റെ വിവിധ ഭാഗങ്ങളില്‍ നടക്കുന്ന ഇടതുപക്ഷ തീവ്രവാദികളുടെ (മാവോയിസ്റ്റുകളുടെ) ആക്രമണത്തെ കുറിച്ച് പഠനങ്ങള്‍ നടത്തിയിട്ടില്ല എന്നും മന്ത്രി മറുപടി നല്‍കി.