തിരുവനന്തപുരം: ശബരിമല വിഷയത്തില്‍ പരസ്യമായി നിലപാട് പ്രഖ്യാപിക്കാതെ സംസ്ഥാന കൗണ്‍സിലില്‍ മുഖ്യമന്ത്രിയെ ഉള്‍പ്പെടെ വിമര്‍ശിച്ച സി.പി.ഐ നടപടിക്കെതിരേ സി.പി.എമ്മില്‍ കടുത്ത അതൃപ്തി.
വിഷയത്തില്‍ പ്രതിച്ഛായ നഷ്ടപ്പെടാതെ രാഷ്ട്രീയനേട്ടം കൊയ്യാനുള്ള സി.പി.ഐ നടപടിയില്‍ നേരത്തെ തന്നെ സി.പി.എമ്മിനുള്ളില്‍ അമര്‍ഷമുണ്ടായിരുന്നു. ഇക്കഴിഞ്ഞ ബുധനാഴ്ച ചേര്‍ന്ന സി.പി.ഐ സംസ്ഥാന കൗണ്‍സിലും സി.പി.എമ്മിനെതിരേ ആഞ്ഞടിച്ചതോടെ സി.പി.ഐക്കെതിരേ പ്രതിരോധം തീര്‍ക്കാനാണ് സി.പി.എം നേതൃത്വം ആലോചിക്കുന്നത്.
യുവതീപ്രവേശന വിഷയത്തില്‍ പരസ്യനിലപാട് സ്വീകരിക്കാതിരിക്കുകയും അതേസമയം സര്‍ക്കാര്‍ നിലപാടിനെ പരോക്ഷമായി വിമര്‍ശിക്കുകയും ചെയ്യുന്നതാണ് സി.പി.എം അണികളെ പ്രകോപിക്കുന്നത്. ബി.ജെ.പി ശബരിമലയില്‍ സംഘര്‍ഷഭരിതമായ അന്തരീക്ഷം സൃഷ്ടിച്ചിട്ടും സി.പി.ഐ സംസ്ഥാന നേതൃത്വമോ അവരുടെ മന്ത്രിമാരോ അതിനെതിരേ ഒരക്ഷരം മിണ്ടാന്‍ തയാറായിരുന്നില്ല. തികച്ചും ഒറ്റപ്പെട്ട നിലയില്‍ ശബരിമലയിലെ രാഷ്ട്രീയ പോര്‍ക്കളത്തില്‍ സി.പി.എമ്മിന് പൊരുതേണ്ടി വന്നു. ഇത് സി.പി.എം സംസ്ഥാന നേതൃത്വത്തിലും അണികളിലും ചര്‍ച്ചയാവുകയും ആഭ്യന്തരമായ പ്രതിഷേധത്തിലേക്കും എത്തിയിരുന്നു.
ബുധനാഴ്ച ചേര്‍ന്ന സി.പി.ഐ സംസ്ഥാന കൗണ്‍സിലില്‍ കടുത്ത വിമര്‍ശനമാണ് സി.പി.എമ്മിനെതിരേ ഉണ്ടായത്. ഒരു കാര്യത്തിലും വേണ്ടത്ര കൂടിയാലോചനകള്‍ നടത്താതെ സി.പി.എമ്മും മുഖ്യമന്ത്രി പിണറായി വിജയനും ഇടതുസര്‍ക്കാരിനെ വിവാദങ്ങളില്‍ തളച്ചിട്ടിരിക്കുകയാണെന്ന് കൗണ്‍സിലില്‍ സി.പി.ഐ നേതാക്കള്‍ കുറ്റപ്പെടുത്തിയിരുന്നു.
സര്‍ക്കാരിന്റെ ദൈനംദിന പ്രവര്‍ത്തനങ്ങളില്‍ കോടതികള്‍ ഇടപെടുന്ന അവസ്ഥ മുന്‍പൊരു സര്‍ക്കാരിന്റെ കാലത്തും ഉണ്ടായിട്ടില്ലെന്നും കൗണ്‍സിലില്‍ വിമര്‍ശനമുയര്‍ന്നിരുന്നു.
ഇതോടെ ഘടകകക്ഷികളെ നിലയ്ക്കുനിര്‍ത്തണമെന്ന ആവശ്യം സി.പി.എം അണികള്‍ നേതൃത്വത്തെ അറിയിച്ചിട്ടുണ്ട്. ഇടതുമുന്നണിയിലെ രണ്ടാമത്തെ കക്ഷിയായിട്ടും സര്‍ക്കാരിനെ കരിവാരി തേയ്ക്കുന്ന നടപടി അവസാനിപ്പിക്കണമെന്നും സി.പി.എം അണികള്‍ പറയുന്നു. വരാനിരിക്കുന്ന ലോകസഭാ തെരെഞ്ഞടുപ്പിനെ മുന്‍നിര്‍ത്തിയുള്ള രാഷ്ട്രീയ നേട്ടത്തിനായാണ് സി.പി.ഐ ഈ വിഷയത്തില്‍ മൗനം പാലിക്കുന്നതെന്നാണ് സി.പി.എം നേതൃത്വത്തിന്റെ വിലയിരുത്തല്‍.
യുവതീപ്രവേശന വിധിയുടെ യഥാര്‍ഥസത്ത ജനങ്ങളെ ബോധ്യപ്പെടുത്തുന്ന ഇടപെടല്‍ പാര്‍ട്ടി കുടുംബയോഗങ്ങളില്‍ നടത്തണമെന്നും സി.പി.ഐ സംസ്ഥാന കൗണ്‍സില്‍ നിര്‍ദേശിച്ചിരുന്നു. ശബരിമലയിലെ സര്‍ക്കാര്‍ നിലപാട് വിശ്വാസികളായ അണികളെ പാര്‍ട്ടിയില്‍നിന്ന് അകറ്റുമെന്ന വിലയിരുത്തലാണ ്‌സി.പി.ഐ നേതൃത്വത്തിനുള്ളത്. അതിനാല്‍ തങ്ങളുടെ അണികളെ കാര്യങ്ങള്‍ ബോധിപ്പിച്ച് കൂടെ നിര്‍ത്താനാണ് സംസ്ഥാന കൗണ്‍സില്‍ ആവശ്യപ്പെട്ടത്.
കുടുംബയോഗങ്ങളില്‍ ജനങ്ങള്‍ ഉന്നയിക്കുന്ന സംശയങ്ങള്‍ ക്ഷമയോട് കേട്ട് അവ ദുരീകരിക്കണമെന്ന് റിപ്പോര്‍ട്ട് അവതരിപ്പിച്ച സെക്രട്ടറി കാനം രാജേന്ദ്രന്‍ അറിയിച്ചു. ഡിസംബര്‍ ഒന്നുമുതല്‍ 20 വരെയാണ് സംസ്ഥാന കൗണ്‍സില്‍ അംഗങ്ങള്‍ പങ്കെടുക്കുന്ന കുടുംബയോഗങ്ങള്‍ നടക്കുക.