കാഞ്ഞങ്ങാട്: കോട്ടച്ചേരി കോ. ഓപ്പറേറ്റിവ് മാര്‍ക്കറ്റിങ് സൊസൈറ്റി പ്രസിഡന്റിനെതിരേ ഡയറക്ടര്‍മാര്‍ അവിശ്വാസത്തിനു നോട്ടിസ് നല്‍കി. കോണ്‍ഗ്രസ് നേതാവ് കൂടിയായ പ്രസിഡന്റ് സോമി മാത്യുവിനെതിരേയാണു നോട്ടിസ് നല്‍കിയത്. കോണ്‍ഗ്രസും മുസ്‌ലിം ലീഗും ബി.ജെ.പിയും ചേര്‍ന്ന മുന്നണിയാണു സൊസൈറ്റി ഭരിക്കുന്നത്.
അതേ സമയം കോണ്‍ഗ്രസ്, മുസ്‌ലിം ലീഗ് നേതൃത്വങ്ങള്‍ അറിയാതെ മുസ്‌ലിം ലീഗിലെയും കോണ്‍ഗ്രസിലെയും അംഗങ്ങള്‍ അവിശ്വാസത്തില്‍ ഒപ്പു വച്ചതു വിവാദമായിട്ടുണ്ട്. അവിശ്വാസം സംബന്ധിച്ചു പാര്‍ട്ടി നേതൃത്വം അറിഞ്ഞിട്ടില്ലെന്നും ആരും ഇക്കാര്യം ചര്‍ച്ച ചെയ്തിട്ടില്ലെന്നും കോണ്‍ഗ്രസ്, മുസ്‌ലിം ലീഗ് നേതാക്കള്‍ പറഞ്ഞു.
പ്രസിഡന്റിന്റെ ഏകാധിപത്യ സമീപനത്തില്‍ പ്രതിഷേധിച്ചാണ് അവിശ്വാസത്തിനു നോട്ടിസ് നല്‍കിയതെന്ന് ഒരു ഡയറക്ടര്‍ പറഞ്ഞു.
അമ്പലത്തറയിലെ ഫാക്ടറിയിലെ കരാര്‍ തൊഴിലാളികളെക്കൊണ്ട് അമിത ജോലി ചെയ്യിക്കുന്നതായി ഡയറക്ടര്‍മാര്‍  ആരോപിക്കുന്നു. മൂന്നര വര്‍ഷം മുമ്പാണ് സോമി മാത്യു പ്രസിഡന്റായി ചുമതലയേറ്റത്.
സംഘത്തില്‍ കോണ്‍ഗ്രസിന് അഞ്ചും ലീഗിനു രണ്ടും ബി.ജെ.പിക്കു നാലും ഡയറക്ടര്‍മാരാണുള്ളത്.
ബാലകൃഷ്ണന്‍, ജോര്‍ജ് ജോസഫ്, വി. നാരായണന്‍, ഹേമലത (കോണ്‍ഗ്രസ്), തെരുവത്ത് മൂസ, കുഞ്ഞാമിന (ലീഗ്), ശങ്കരന്‍ വാഴക്കോട്, എം. കുഞ്ഞമ്പു, എച്ച്.ആര്‍ സുകന്യ, ഉമേശന്‍ (ബി. ജെ.പി) എന്നിവരാണു സൊസൈറ്റിയുടെ ഡയറക്ടര്‍മാര്‍.