കാട്ടാക്കട: സുരക്ഷാ മുന്‍കരുതലൊരുക്കാന്‍ അധികൃതര്‍ വൈകുന്നതോടെ കുണ്ടമണ്‍ഭാഗം പനച്ചോട്ടുകടവ് മുങ്ങി മരണങ്ങളുടെ കേന്ദ്രമായി മാറുന്നു. വിളവൂര്‍ക്കല്‍ പഞ്ചായത്തില്‍ മൂലത്തോപ്പിലാണ് പനച്ചോട്ടുകടവ്. നിരവധിപേര്‍ കുളിക്കാനെത്തുന്നുണ്ടെങ്കിലും കല്‍പടവുകളുള്ള കുളിക്കടവില്ല. കരമനയാറിന്റെ തീരത്തെ കടവില്‍ വെള്ളമുയരുന്നതും താഴുന്നതും എപ്പോഴാണെന്നു നാട്ടുകാര്‍ക്കുപോലും നിശ്ചയമില്ല. ഈ സാഹചര്യത്തിലാണിവിടെ അപകടങ്ങളുണ്ടാകുന്നതെന്ന് അവര്‍ പറയുന്നു. കഴിഞ്ഞ ചൊവ്വാഴ്ചയാണ് അവസാനമുണ്ടായ അപകടം. കുളിക്കാനിറങ്ങിയ സഹോദരങ്ങള്‍ ആറ്റില്‍ മുങ്ങി മരിച്ചു. അപകടത്തില്‍പ്പെട്ട മറ്റൊരു കുട്ടിയെ നാട്ടുകാര്‍ രക്ഷിച്ചു. അടിയൊഴുക്കും ചുഴികളും പാറയിടുക്കുകളും നിറഞ്ഞ പുഴയില്‍ പലയിടവും ആഴമേറിയ കയങ്ങളാണ്. ഇവരില്‍ ഭൂരിഭാഗവും യുവാക്കളും കൗമാരക്കാരുമാണ്. മണല്‍വാരല്‍ മൂലമുണ്ടായ കയങ്ങള്‍, അടിയൊഴുക്കു കാരണം രൂപപ്പെടുന്ന ചുഴികള്‍, അടിത്തട്ടിലെ ചെളി നിക്ഷേപങ്ങള്‍, പാറക്കൂട്ടങ്ങള്‍ എന്നിവയാണ് അപകടത്തിനിടയാക്കുന്നത്. നീന്തല്‍ അറിയാവുന്നവര്‍പോലും ഇത്തരം കയങ്ങളില്‍പ്പെടുമ്പോള്‍ വെള്ളത്തില്‍നിന്നു കയറാനാകാതെ കുടുങ്ങും. കാല്‍വഴുതിയുള്ള വീഴ്ചകളില്‍ പാറക്കൂട്ടങ്ങളില്‍ തലയിടിച്ച് ബോധരഹിതരാകും. ഇതും അപകടതീവ്രത വര്‍ധിപ്പിക്കുന്നു. വിളപ്പില്‍, വിളവൂര്‍ക്കല്‍ പഞ്ചായത്തുകളില്‍ കരമനയാറിന്റെ മിക്ക പ്രദേശവും അപകടകരമാണ്. അപകടമുണ്ടാക്കുന്ന മിക്ക കടവുകള്‍ക്കു സമീപത്തും ആള്‍ത്താമസം കുറവാണ്. സ്വകാര്യതക്കുവേണ്ടി മുതിര്‍ന്നവരുടെ കണ്ണുവെട്ടിച്ചും കുട്ടികള്‍ പല കടവുകളിലും എത്തുന്നുണ്ട്. ആറിലേക്ക് ഇറങ്ങാന്‍ കഴിയുന്നിടത്തൊക്കെ ഇക്കൂട്ടര്‍ എത്തിപ്പറ്റുന്നതിനാല്‍ അപകടം തടയാനും കഴിയുന്നില്ല.
വിളപ്പില്‍ പഞ്ചായത്തിലെ പേയാട് അരുവിപ്പുറം കടവ്, കാവടിക്കടവ് എന്നിവിടങ്ങളില്‍ മാത്രം 16 പേര്‍ മരിച്ചിട്ടുണ്ട്. അരുവിപ്പുറം കടവില്‍ അപകടമുന്നറിയിപ്പ് ബോര്‍ഡ് സ്ഥാപിച്ചതുമാത്രമാണ് നടപടി. വിളവൂര്‍ക്കല്‍ പഞ്ചായത്തിലെ പനച്ചോട്ടുകടവില്‍ എട്ടു ജീവനുകളാണ് അസ്തമിച്ചത്. പാപ്പനംകോട് പാറയില്‍ക്കടവ്, വട്ടിയൂര്‍ക്കാവിനു സമീപം മേലേക്കടവ്, ആയിരവില്ലിക്ഷേത്രത്തിനു സമീപം ആറാട്ടുകടവ്, കുലശേഖരം ശങ്കരനാരായണ ക്ഷേത്രത്തിനു സമീപമുള്ള കടവ്, തമലത്തിനു സമീപം ചുള്ളമുക്ക് തെറ്റിക്കുഴി, കരമന കാട്ടാന്‍വിള, തെറ്റിക്കുഴി, ആറാട്ടുകടവ്, ബലിക്കടവ്, അലക്കുകടവ് എന്നിങ്ങനെ അപകടമേഖലകളുടെ എണ്ണം നീളും. അപകടമൊഴിവാക്കാന്‍ പലവഴികള്‍സ്ഥിരം അപകടമേഖലകളില്‍ മുന്നറിയിപ്പ് ബോര്‍ഡുകള്‍ സ്ഥാപിക്കുക, പ്രദേശവാസികളുടെ സഹായത്തോടെ ജാഗ്രതാ സമിതി രൂപവല്‍ക്കരിക്കുക എന്നിവയാണ് പരിഹാരമായി നിര്‍ദേശിക്കപ്പെടുന്നത്. അപകടകരമായ രീതിയില്‍ അപരിചിതരും കൗമാരക്കാരും ആറിലേക്കിറങ്ങുന്നതു തടയാന്‍ ഇതിലൂടെ കഴിയുമെന്ന് ചൂണ്ടികാണിക്കപ്പെടുന്നു.
സ്‌കൂള്‍, പ്ലസ്ടു വിദ്യാര്‍ഥികള്‍ക്ക് അപകടബോധവല്‍കരണ ക്യാംപ് സംഘടിപ്പിക്കുകയാണ് മറ്റൊരു മാര്‍ഗം. കുളങ്ങളിലും മറ്റും നീന്തി പരിചയമുള്ളവര്‍ക്കുപോലും ആറ്റിലെ ഒഴുക്കില്‍ നീന്താന്‍ കഴിയില്ല. ചെളിയില്‍ താഴ്ന്നുപോയാല്‍ തിരികെ ഉയര്‍ന്നുവരാന്‍ കഴിയില്ല. ഇത്തരം സാഹചര്യങ്ങളില്‍ പരിചയമുള്ളവര്‍ക്കു മാത്രമേ നീന്തിക്കയറാന്‍ കഴിയുകയുള്ളൂ. ആറ്റില്‍ ഇറങ്ങണമെന്ന് നിര്‍ബന്ധമുള്ളവര്‍ ലൈഫ് ജാക്കറ്റ് പോലുള്ള സുരക്ഷാസജ്ജീകരണങ്ങള്‍ ഉപയോഗിക്കുകയാണ് അപകടമൊഴിവാക്കാനുള്ള മറ്റൊരു മാര്‍ഗമെന്ന് നാട്ടുകാര്‍ പറയുന്നു.