കൊല്ലം: ഹര്‍ത്താലിനിടെ കൊല്ലത്ത് അങ്ങിങ്ങ് അക്രമം. കല്ലേറില്‍ കാവനാട് പൂവന്‍പുഴയില്‍ ബംഗുളൂരു-തിരുവനന്തപുരം കെ.എസ്.ആര്‍.ടി.സി വോള്‍വോ ബസിന്റെ ചില്ലുതകരുകയും ഡ്രൈവര്‍ക്ക് പരുക്കേല്‍ക്കുകയും ചെയ്തു.

ഇന്നു ഉച്ചയ്ക്കായിരുന്നു സംഭവം. മൂന്നംഗ സംഘമാണ് ആക്രമണം നടത്തിയത്. ബസില്‍ 30 യാത്രക്കാരുണ്ടായിരുന്നു. ഡ്രൈവര്‍ സത്യനാണ് പരുക്കേറ്റത്. തുടര്‍ന്ന് യാത്രക്കാരെ കൊല്ലം ബസ്‌സ്‌റ്റേഷനില്‍ ഇറക്കി. പ്രകടനത്തിനിടെ പ്രവര്‍ത്തകര്‍ നഗരത്തില്‍ പലയിടത്തും സി.പി.എമ്മിന്റെ കൊടികള്‍ നശിപ്പിച്ചു.

രാവിലെ കിളിക്കൊല്ലൂര്‍ ഭാഗത്ത് ഒരു സംഘം വാഹനങ്ങള്‍ തടഞ്ഞതും സംഘര്‍ത്തിന് കാരണമായിരുന്നു. ജില്ലയില്‍ കടകമ്പോളങ്ങള്‍ പൂര്‍ണമായും അടഞ്ഞുകിടന്നു. സ്വകാര്യവാഹനങ്ങള്‍,വിവാഹം,തീര്‍ഥാടനം,എയര്‍പോര്‍ട്ടിലേക്കുള്ള വാഹനങ്ങളും ബോര്‍ഡ് വച്ചാണ് യാത്ര ചെയ്തത്.