പീരുമേട്: സമൂഹമാധ്യമങ്ങള്‍ വഴി പ്രദേശത്ത് വിചിത്ര ജീവിയുണ്ടെന്ന വ്യാജ സന്ദേശങ്ങള്‍ പ്രചരിക്കുന്നത് നാട്ടില്‍ പരിഭ്രാന്തി പടര്‍ത്തുന്നു. വിചിത്ര ജീവിയുടെ ചിത്രങ്ങളും ജീവിയുടെ ആക്രമണത്തില്‍ പരുക്കേറ്റ സ്ത്രീയുടെ ചിത്രങ്ങളുമാണ് പ്രചരിക്കുന്നത്. മലയോര മേഖലയിലും തോട്ടം മേഖലയിലുമായാണ് സന്ദേശങ്ങള്‍ പരിഭ്രാന്തി പടര്‍ത്തിയത്. പലയിടങ്ങളിലും സന്ദേശം കണ്ട രക്ഷകര്‍ത്താക്കള്‍ തങ്ങളുടെ മക്കള്‍ പഠിക്കുന്ന സ്‌കൂളുകളില്‍ വിളിച്ചും നേരില്‍ ചെന്നും കുട്ടികളെ ശ്രദ്ധിക്കണമെന്ന മുന്നറിയിപ്പ് നല്‍കി. സന്ദേശങ്ങള്‍ കണ്ട ദൂരദേശത്തുള്ള ബന്ധുക്കളും വിദേശത്തുള്ളവരും ഫോണിലൂടെയും മറ്റും സത്യാവസ്ഥ അന്വേഷിച്ചെങ്കിലും കൃത്യമായ ഉത്തരം കിട്ടിയില്ല.
ഇത്തരത്തിലുള്ള സന്ദേശങ്ങള്‍ സമൂഹ മാധ്യമങ്ങള്‍ വഴി പ്രചരിക്കുന്നത് പതിവാണ്. സന്ദേശത്തോടൊപ്പം പീരുമേട്ടില്‍ വിചിത്ര ജീവിയെ കണ്ടെന്ന വിവരം കൂടി ചേര്‍ത്തതാണ് പ്രദേശത്തുള്ളവരെ ഭയപ്പെടുത്തുന്നത്.
എന്നാല്‍, വിചിത്ര ജീവി എന്നത് വ്യാജമാണെന്നും ഇത്തരത്തില്‍ പരാതികള്‍ ഇതുവരെ റിപ്പോര്‍ട്ട് ചെയ്തിട്ടില്ലെന്നും പീരുമേട് എസ്.ഐ ആര്‍. രാജേഷ് പറഞ്ഞു. സമൂഹ മാധ്യമങ്ങളിലെ വ്യാജ സന്ദേശങ്ങളില്‍ വഞ്ചിതരാവാതിരിക്കാന്‍ എല്ലാവരും ശ്രദ്ധ ചെലുത്തണമെന്നും അദ്ദേഹം കൂട്ടിച്ചേര്‍ത്തു.