മുംബൈ: മുന്‍ നായകന്‍ എം.എസ് ധോണി ക്രിക്കറ്റിലേക്ക് മടങ്ങിവരുമോ എന്ന ആശങ്കയ്ക്ക് അടുത്ത വര്‍ഷം നടക്കുന്ന ഐ.പി.എല്‍ ടൂര്‍ണമെന്റ് മറുപടി നല്‍കും.
ഐ.പി.എല്ലില്‍ ചെന്നൈ സൂപ്പര്‍ കിങ്‌സില്‍ ഫോം കണ്ടെത്തിയാല്‍ ആസ്‌ത്രേലിയയില്‍ നടക്കുന്ന ലോകകപ്പില്‍ താരത്തെ പരിഗണിക്കാമെന്ന് ക്രിക്കറ്റ് ടീം കോച്ച് രവിശാസ്ത്രി അറിയിച്ചതോടെയാണിത്. അടുത്ത വര്‍ഷം നടക്കാനിരിക്കുന്ന ഐ.പി.എല്‍ വരെയെങ്കിലും കാത്തിരിക്കണമെന്നും അതുവരെ ധോണിയുടെ ഭാവിയെക്കുറിച്ച് അഭ്യൂഹങ്ങള്‍ പരത്തരുതെന്നുമാണ് കോച്ച് പറഞ്ഞത്. ഒരു അഭിമുഖത്തിലാണ് ധോണിയുടെ അന്താരാഷ്ട്ര ക്രിക്കറ്റിലെ ഭാവിയെക്കുറിച്ച് ശാസ്ത്രിയുടെ മറുപടി.
ഐ.പി.എല്ലിന് ശേഷം മാത്രമേ ധോണിയെ വീണ്ടും ദേശീയ ടീമിലുള്‍പ്പെടുത്തുമോയെന്ന കാര്യത്തില്‍ തീരുമാനമെടുക്കാന്‍ കഴിയൂ. മാത്രവുമല്ല ധോണിയെക്കൂടാതെ മറ്റു വിക്കറ്റ് കീപ്പര്‍മാരുടെയും പ്രകടനം പരിഗണിക്കും.
ടി20 ലോകകപ്പിനുള്ള ഇന്ത്യയുടെ 15 അംഗ ടീമിനെ പ്രഖ്യാപിക്കുന്നതിനു മുന്‍പുള്ള അവസാന ടൂര്‍ണമെന്റാണിതെന്നതിനാലാണ് ശാസ്ത്രി ഇങ്ങനെ പ്രസ്താവിച്ചത്. കഴിഞ്ഞ ഏകദിന ലോകകപ്പിലാണ് ധോണി അവസാനമായി ഇന്ത്യക്ക് വേണ്ടി ഗ്ലൗസണിഞ്ഞത്.