ഗൂഡല്ലൂര്‍: കഴുതപ്പുലിയെ ചത്ത നിലയില്‍ കണ്ടെത്തി. മുതുമല കടുവാസംരക്ഷണ കേന്ദ്രത്തിലെ മസിനഗുഡി വനമേഖലയിലെ മായാര്‍ വനത്തിലാണ് ഏഴ് വയസ് പ്രായമുള്ള പെണ്‍കഴുതപ്പുലിയെ ചത്തനിലയില്‍ കണ്ടെത്തിയത്. വനത്തില്‍ റോന്ത് ചുറ്റുകയായിരുന്ന വനപാലകരാണ് കഴുതപ്പുലിയെ കണ്ടെത്തിയത്. കാട്ടുപന്നിയെ ഭക്ഷിച്ചത് ദഹിക്കാത്തതിനാലാണ് കഴുതപ്പുലി ചത്തതെന്നാണ് വനംവകുപ്പ് അനുമാനിക്കുന്നത്. വിവരമറിഞ്ഞ് മുതുമല കടുവാസംരക്ഷണ കേന്ദ്രം ഫീല്‍ഡ് ഡയറക്ടര്‍ ശ്രീനിവാസ റെഡി, മസിനഗുഡി റെയ്ഞ്ചര്‍ ചടയപ്പന്‍, ഫോറസ്റ്റര്‍ ചന്ദനരാജ് എന്നിവര്‍ സ്ഥലത്തെത്തി തുടര്‍നടപടി സ്വീകരിച്ചു. ഡോ. വിജയരാഘവന്‍ പോസ്റ്റ്‌മോര്‍ട്ടം നടത്തി.