നെടുമ്പാശ്ശേരി: ഫേസ്ബുക്കിലൂടെ പരിചയപ്പെട്ട പ്രായപൂര്‍ത്തിയാകാത്ത പെണ്‍കുട്ടിയെ പ്രണയം നടിച്ച് ലൈംഗികമായി പീഡിപ്പിച്ച കേസില്‍ മൂന്ന് യുവാക്കള്‍ പിടിയില്‍. വയല്‍കര ചില്ലിക്കൂട്ടത്തില്‍ വീട്ടില്‍ സച്ചില്‍ (20), പാലപ്രശേരി കുന്നത്ത് വീട്ടില്‍ അമീസ് (20), മാള കോട്ടമുറി കീപ്പനമറ്റം വീട്ടില്‍ ആഷിക് (23) എന്നിവരെയാണ് അങ്കമാലി സി.ഐ മുഹമ്മദ് റിയാസിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്. ചെങ്ങമനാട് പൊലിസ് സ്റ്റേഷന്‍ പരിധിയിലാണ് സംഭവം. നാല് പേര്‍ക്കെതിരേയാണ് പരാതി. നാലാമനെ പിടികൂടാന്‍ പൊലിസ് അന്വേഷണം ഊര്‍ജിതമാക്കിയിട്ടുണ്ട്. 17 വയസുകാരിയാണ് പീഡനത്തിനിരയായത്. സംഘം ഇത്തരത്തില്‍ ചതിയില്‍പെടുത്തി പീഡിപ്പിച്ച മറ്റേതെങ്കിലും കേസുകളുണ്ടോയെന്നും പൊലിസ് അന്വേഷിച്ചു വരികയാണ്. പിടിയിലായവരെ കോടതിയില്‍ ഹാജരാക്കി റിമാന്‍ഡ് ചെയ്തു.