കോട്ടയം: ആചാര വിശ്വാസ സംരക്ഷണത്തെ ചൊല്ലി ഇടഞ്ഞു നില്‍ക്കുന്ന എന്‍.എസ്.എസിനെ അനുനയിപ്പിക്കാന്‍ സര്‍ക്കാരും സി.പി.എമ്മും ശ്രമം തുടങ്ങി. തിരുവിതാംകൂര്‍ ദേവസ്വം ബോര്‍ഡ് അധ്യക്ഷന്‍ എന്‍.വാസുവാണ് അനുനയ നീക്ക ദൂതുമായി പെരുന്നയില്‍ എത്തിയത്. ശബരിമല യുവതീ പ്രവേശന വിഷയത്തെ ചൊല്ലി സര്‍ക്കാരുമായി ഇടഞ്ഞു നില്‍ക്കുന്ന എന്‍.എസ്.എസിനെ അനുനയിപ്പിക്കുന്നതിന്റെ ഭാഗമായി കഴിഞ്ഞ ദിവസം ജനറല്‍ സെക്രട്ടറി ജി.സുകുമാരന്‍ നായരുമായി കൂടിക്കാഴ്ച നടത്തിയത്.
സംസ്ഥാന സര്‍ക്കാരിന്റെ നിര്‍ദേശപ്രകാരമായിരുന്നു ദേവസ്വം ബോര്‍ഡ് പ്രസിഡന്റ് എന്‍.എസ്.എസ് ആസ്ഥാനത്ത് എത്തിയത്. ജി. സുകുമാരന്‍ നായരുമായി നടത്തിയ കൂടിക്കാഴ്ച 15 മിനുട്ടോളം നീണ്ടു. ശബരിമലയില്‍ യുവതികളെ ഇത്തവണ പ്രവേശിപ്പിക്കില്ലെന്ന നിലപാടാണ് സംസ്ഥാന സര്‍ക്കാരിന്റേതെന്ന് ദേവസ്വം ബോര്‍ഡ് പ്രസിഡന്റ് എന്‍.എസ്.എസ് ജനറല്‍ സെക്രട്ടറിയെ അറിയിച്ചു.ശബരിമലയില്‍ പ്രത്യേക അതോറിറ്റി രൂപീകരിക്കുന്നതിനെ എന്‍.എസ്.എസ് നേതൃത്വം അനുകൂലിച്ചിരുന്നില്ല. ഈ നിലപാട് ചര്‍ച്ചയില്‍ ജി.സുകുമാരന്‍ നായര്‍ ആവര്‍ത്തിച്ചു. എന്‍.എസ്.എസിനെ ഏത് വിധേനയേയും അനുനയിപ്പിക്കുന്നതിനുള്ളനീക്കം ഉപതെരഞ്ഞെടുപ്പിന് ശേഷം സി.പി.എം നേതൃത്വം ആരംഭിച്ചിരുന്നു. ഇതിന്റെ ഭാഗമായാണ് വട്ടിയൂര്‍കാവില്‍ സമുദായം പറഞ്ഞ് വോട്ട് പിടിച്ചുവെന്ന് ചൂണ്ടിക്കാട്ടി എന്‍.എസ്.എസിനെതിരേ സി.പി.എം നല്‍കിയ പരാതി കഴിഞ്ഞ ദിവസം പിന്‍വലിച്ചത്.