ന്യൂഡല്‍ഹി: 'ഞങ്ങള്‍ കുറ്റവാളികളല്ല' പറയുന്നത് ജമ്മു കശ്മീരില്‍ തടവില്‍ കഴിയുന്ന നാഷനല്‍ കോണ്‍ഫറന്‍സ് നേതാവ് ഫാറൂഖ് അബ്ദുല്ലയാണ്. കോണ്‍ഗ്രസ് നേതാവ് ശശി തരൂരിനയച്ച കത്തിലാണ് തന്റെയും സഹപ്രവര്‍ത്തകരുടെയും നിസഹായാവസ്ഥ അദ്ദേഹം പറയുന്നത്.
ഒരു മുതിര്‍ന്ന പാര്‍ലമെന്റേറിയനായ തന്നോട് ഇത്തരത്തിലല്ല പെരുമാറേണ്ടതെന്നും ഫാറൂഖ് അബ്ദുല്ല കത്തില്‍ പറയുന്നുണ്ട്. ഒക്ടോബര്‍ 21ന് ശശി തരൂര്‍ അയച്ച കത്തിനുള്ള മറുപടിയിലാണ് അദ്ദേഹം കാര്യങ്ങള്‍ വിശദീകരിക്കുന്നത്.
തരൂരിന്റെ കത്ത് ഡിസംബര്‍ രണ്ടിനാണ് ലഭിച്ചത്, മജിസ്‌ട്രേറ്റാണ് കത്ത് ഏല്‍പ്പിച്ചതെന്നും കൃത്യസമയത്ത് പോസ്റ്റുകള്‍ ലഭിക്കാത്തത് ദൗര്‍ഭാഗ്യകരമാണെന്നും കത്തില്‍ പറയുന്നു.
ജയിലില്‍ കഴിയുന്ന ഫാറൂഖ് സാബിന്റേതാണെന്ന് വ്യക്തമാക്കി ട്വിറ്ററിലൂടെയാണ് തരൂര്‍ കത്ത് പുറത്തുവിട്ടത്.
പാര്‍ലമെന്റംഗങ്ങള്‍ക്ക് ശീതകാല സമ്മേളനത്തില്‍ പങ്കെടുക്കാന്‍ അനുമതി നല്‍കണമെന്നും അതവരുടെ അവകാശമാണെന്നും പറഞ്ഞ തരൂര്‍, കേന്ദ്രസര്‍ക്കാര്‍ ഇത്തരം അറസ്റ്റുകളിലൂടെ പ്രതിപക്ഷ ശബ്ദങ്ങളെ അടിച്ചമര്‍ത്താന്‍ ശ്രമിക്കുകയാണെന്നും കൂട്ടിച്ചേര്‍ത്തു.
ജമ്മു കശ്മീരിന്റെ പ്രത്യേക പദവി എടുത്തുകളഞ്ഞതിനു പിന്നാലെയാണ് പൊതുസുരക്ഷാ നിയമമെന്ന പേരില്‍ അബ്ദുല്ലയേയും മറ്റു നൂറോളം നേതാക്കളെയും തടവിലാക്കിയിരിക്കുന്നത്.