കാബൂള്‍: പടിഞ്ഞാറന്‍ അഫ്ഗാനിസ്ഥാനിലെ ഹെറാത് പ്രവിശ്യയില്‍ ശീഈ പള്ളിയിലുണ്ടായ സ്‌ഫോടനത്തില്‍ 30 പേര്‍ കൊല്ലപ്പെട്ടു. 20 പേരുടെ മൃതദേഹങ്ങള്‍ കണ്ടെടുത്തുവെന്ന് അന്താരാഷ്ട്ര വാര്‍ത്താ ഏജന്‍സി റിപ്പോര്‍ട്ട് ചെയ്തു.
പത്ത് പേര്‍ക്ക് പരുക്കേറ്റിട്ടുണ്ടെന്ന് പൊലിസ് അറിയിച്ചു. ജവാദിയ പള്ളിയുടെ ഗേറ്റിനു സമീപമാണ് സ്‌ഫോടനം.
കാര്‍ബോംബാണ് പൊട്ടിത്തെറിച്ചതെന്ന് ആഭ്യന്തരമന്ത്രാലയ വക്താവ് നജീബ് ഡാനിഷ് പറഞ്ഞു. ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. ഈയിടെ ഐ.എസ് ശീഈ കേന്ദ്രങ്ങള്‍ ലക്ഷ്യംവച്ച് നിരവധി ആക്രമണങ്ങള്‍ നടത്തിയിരുന്നു. കഴിഞ്ഞ ദിവസം കാബൂളിലെ ഇറാഖ് എംബസിക്കെതിരേ ഐ.എസ് നടത്തിയ ആക്രമണത്തില്‍ രണ്ടു പേര്‍ കൊല്ലപ്പെട്ടിരുന്നു.