കാസര്‍കോട്: സമൂഹത്തില്‍ സൗഹാര്‍ദ്ദം നിലനിര്‍ത്തുന്ന  സംഘടനയായി സ്റ്റുഡന്റ് പൊലിസ് കേഡറ്റുകള്‍  മാറണമെന്നു നിയമസഭാ സ്പീക്കര്‍ പി. ശ്രീരാമകൃഷ്ണന്‍. കഴിഞ്ഞ എസ്.എസ്.എല്‍.സി പരീക്ഷയില്‍  മുഴുവന്‍ വിഷയങ്ങളിലും എ പ്ലസ്  കരസ്ഥമാക്കിയ  എസ്.പി.സി കേഡറ്റുകള്‍ക്കുള്ള ജില്ലാതല അനുമോദന സമ്മേളനം ഹൊസ്ദുര്‍ഗ് ജി.എച്ച്.എസ്.എസില്‍ ഉദ്ഘാടനം ചെയ്യുകയായിരുന്നു അദ്ദേഹം.
ആധുനിക ജനാധിപത്യസമൂഹത്തില്‍ ജനങ്ങളുടെ കൂട്ടുകാരാണു പൊലിസ്. എന്നാല്‍  ചില കോണുകളിലെങ്കിലും  ബ്രിട്ടിഷുകാരുടെ പൊലിസ് മാന്വലിന്റെ അവസ്ഥ തുടരുന്നുണ്ട്. രാജ്യത്തെ ഏറ്റവും മികച്ച പൊലിസ് സംവിധാനമാണു കേരളത്തിലുള്ളത്. പൊലിസിന്റെ വിവിധ മുഖങ്ങളിലൊന്നാണ് എസ്.പി.സി. കുട്ടികളെ പരിശീലിപ്പിക്കുന്നതോടൊപ്പം അവരില്‍ നിന്നു പഠിക്കാനും സാധിക്കും. ജീവിതത്തില്‍ സവിശേഷമായ ദിശാബോധം നല്‍കുന്ന സാഹചര്യം ഒരുക്കാന്‍ എസ്.പി.സി സംവിധാനത്തിനു സാധിക്കുമെന്നും അദ്ദേഹം പറഞ്ഞു.
    യോഗത്തില്‍ എം. രാജഗോപാലന്‍ എം.എല്‍.എ അധ്യക്ഷനായി. ജില്ലാ കലക്ടര്‍ കെ. ജീവന്‍ബാബു  മുഖ്യാതിഥിയായി. ജില്ലാ പൊലിസ് മേധാവി കെ.ജി സൈമണ്‍ ആമുഖ പ്രഭാഷണം നടത്തി. ആര്‍.ടി.ഒ ബാബു ജോണ്‍, കാഞ്ഞങ്ങാട് ഡിവൈ.എസ്.പി. കെ. ദാമോദരന്‍, കാഞ്ഞങ്ങാട് ഡി.ഇ.ഒ ഇ. പ്രകാശ് കുമാര്‍, ഡിവിഷണല്‍ ഫോറസ്റ്റ് ഓഫിസര്‍ എം. രാജീവന്‍, എക്‌സൈസ്  സര്‍ക്കിള്‍ ഇന്‍സ്‌പെക്ടര്‍ ഡി. ബാലചന്ദ്രന്‍, കാഞ്ഞങ്ങാട് മുനിസിപ്പല്‍ വൈസ് ചെയര്‍പേഴ്‌സണ്‍ എല്‍. സുലൈഖ, സ്ഥിരംസമിതി അധ്യക്ഷന്‍ മഹമൂദ് മുറിയനാവി, കൗണ്‍സലര്‍ എച്ച്. റംഷീദ്, സ്‌പോര്‍ട്‌സ് കൗണ്‍സില്‍ സെക്രട്ടറി സുധീപ് ബോസ്, ഹോസ്ദുര്‍ഗ് ജി.എച്ച്.എസ്.എസ് പ്രിന്‍സിപ്പാല്‍ ഒ.വി മോഹനന്‍, പി.ടി.എ പ്രസിഡന്റ് പി.സുധാകരന്‍, എസ്.പി.സി. ജില്ലാ നോഡല്‍ ഓഫിസര്‍ ഡിവൈ.എസ്.പി ടി.പി പ്രേമരാജന്‍, ഹൊസ്ദുര്‍ഗ് സ്‌കൂള്‍ പ്രധാനധ്യാപകന്‍ പി.വി ജയരാജന്‍ എന്നിവര്‍ സംസാരിച്ചു. കഴിഞ്ഞ വര്‍ഷം എസ്.എസ്.എല്‍.സി പരീക്ഷയില്‍ മുഴുവന്‍ വിഷയങ്ങളിലും എ പ്ലസ് കരസ്ഥമാക്കിയ 89 കേഡറ്റുകള്‍ക്കു ചടങ്ങില്‍ പുരസ്‌കാരം നല്‍കി.