ചേര്‍ത്തല: തിരക്കേറിയ റോഡ് സൈഡില്‍ ഉയരക്കുറവില്‍ സ്ഥാപിച്ചിട്ടുള്ള ട്രാന്‍സ്‌ഫോര്‍മറിലെ ഫ്യൂസ് അപകട ഭീഷണി ഉയര്‍ത്തുന്നതായി പരാതി.
കോടംതുരുത്ത് പഞ്ചായത്ത് അഞ്ചാം വാര്‍ഡ് മഹാത്മാ റോഡ് സൈഡില്‍ സ്ഥാപിച്ചിട്ടുള്ള ട്രാന്‍സ്‌ഫോര്‍മറാണ് നാട്ടുകാര്‍ക്ക് ഭീഷണിയാകുന്നത്. ഇതിന് സമീപത്തായി കുട്ടികള്‍ ഫുട്‌ബോള്‍ കളിക്കുന്നുണ്ട്.
ഇവിടെ ഫുട്‌ബോള്‍ പരിശീലിക്കുന്ന കൊച്ചുകുട്ടികളുടെ വരെ കൈയെത്തും ഉയരത്തിലാണ് ട്രാന്‍സ്‌ഫോര്‍മറിന് താഴത്തെ ഫ്യൂസുകള്‍ സ്ഥാപിച്ചിരിക്കുന്നതെന്ന് നാട്ടുകാര്‍ പറഞ്ഞു.
കൂടാതെ വളരെ തിരക്കേറിയ റോഡ് കൂടിയാണിത്. ഇവിടുത്തെ അപകടാവസ്ഥ ചൂണ്ടിക്കാണിച്ച് നാട്ടുകാര്‍ വൈദ്യുതി വകുപ്പിനും ജനപ്രതിനിധികള്‍ക്കും പരാതി നല്‍കിയിട്ടും നടപടി ഉണ്ടായില്ല.
അപകടം ഉണ്ടാക്കുംവിധം സ്ഥാപിച്ചിട്ടുള്ള ട്രാന്‍സ്‌ഫോര്‍മര്‍ ഫ്യൂസുകള്‍ അടിയന്തിരമായി ഉയര്‍ത്തി സ്ഥാപിക്കുകയോ വേലി കെട്ടി സുരക്ഷിതത്വം ഉറപ്പാക്കുകയോ ചെയ്യണമെന്ന ആവശ്യം ശക്തമായി.