ഇന്ത്യന്‍ ടീമിന്റെ ജഴ്‌സിയില്‍ മലയാളി താരത്തിന്റെ രണ്ടാം അരങ്ങേറ്റം ആഗ്രഹിച്ച കാണികളെ നിരാശയിലാക്കി ഹൈദരാബാദിലെ ആദ്യ മത്സരത്തില്‍ നിന്ന് ഒരു മാറ്റവും വരുത്താതെയാണ് ഫൈനല്‍ ടീം പ്രഖ്യാപിച്ചത് .ദക്ഷിണാഫ്രിക്കയ്‌ക്കെതിരേ മികച്ച തുടക്കം കുറിക്കാന്‍ കഴിഞ്ഞ സ്വന്തം ഗ്രൗണ്ടില്‍ വീണ്ടും ഒരു മികച്ച പ്രകടനം ആഗ്രഹിച്ചിരുന്ന സഞ്ജുവിന് ടീമില്‍ ഇടം നേടാന്‍ കഴിഞ്ഞില്ല. സഞ്ജുവിനെ ഒഴിവാക്കി ഫൈനല്‍ ടീമിനെ പ്രഖ്യാപിച്ചതോടെ ഗ്യാലറിയില്‍ നിന്ന് പ്രതിഷേധ സ്വരങ്ങള്‍ ഉയര്‍ന്നെങ്കിലും ടീമില്‍ യാതൊരു മാറ്റവും ആവശ്യമില്ലെന്ന നിലപാടാണ് മാനേജെ്‌മെന്റ് സ്വീകരിച്ചത്. സഞ്ജുവിന് വേണ്ടി ഗ്യാലറിയില്‍ നിന്ന് ഉയര്‍ന്ന ശബ്ദങ്ങള്‍ക്കിടയില്‍ മുഖ്യ പരിശീലകന്‍ രവി ശാസത്രി സഞ്ജുവിനെ ആശ്വസിപ്പിച്ചും അഭിനന്ദിച്ചുമാണ് ബെഞ്ചിലേക്ക് മടക്കി അയച്ചത്. കളിയില്‍ സെന്റിമെന്‍സിന് കാര്യമില്ലെന്ന സന്ദേശം കൂടിയാണ് സഞ്ജുവിനെ പുറത്തിരുത്തിയതിലൂടെ മാനേജെ്മന്റ് പ്രകടിപ്പിച്ചത്. വിന്‍ഡീസിന്റെ ബാറ്റിങ്ങിനിടെ രോഹിതിന് പകരക്കാരനായി എട്ടാം ഓവറിന് ശേഷം സഞ്ജു ഫീല്‍ഡീലെത്തിയത് കാണികള്‍ക്ക് അല്‍പമെങ്കിലും ആശ്വാസമായി.