തിരൂര്‍: മഴക്കാലത്ത് നഗരത്തില്‍ വെള്ളക്കെട്ട് ഇല്ലാതാക്കാന്‍ നഗരസഭ നടപടി തുടങ്ങി. നഗരപ്രദേശങ്ങളില്‍നിന്ന് മഴവെള്ളം ഒഴുക്കിവിടാന്‍ പുതിയ ഡ്രൈനേജ് നിര്‍മാണ പ്രവൃത്തി പുരോഗമിക്കുകയാണ്. മാലിന്യം കെട്ടികിടന്ന ഡ്രെയിനേജുകള്‍ മണ്ണിട്ടുമൂടി പകരം മാര്‍ക്കറ്റ് റോഡിലും മറ്റുമായി പുതിയ വലിയ ഡ്രെയിനേജാണ് പണിയുന്നത്. പുതിയ ഡ്രെയിനേജിനായി കുഴിയെടുക്കുമ്പോഴുള്ള മണ്ണ് മാലിന്യം കെട്ടികിടക്കുന്ന ഡ്രെയിനേജില്‍ നിക്ഷേപിച്ചാണ് പ്രവൃത്തി.
നഗരത്തില്‍ നിന്നുള്ള മാലിന്യം ഡ്രെയിനേജിലൂടെ ഒഴുകിയെത്തുന്നത് ബുദ്ധിമുട്ടുണ്ടാക്കുന്നതായുള്ള നാട്ടുകാരുടെ പരാതിയില്‍ കോടതി ഇടപെട്ട് ഉത്തരവിറക്കിയതിന്റെ കൂടി അടിസ്ഥാനത്തില്‍ കച്ചവട സ്ഥാപനങ്ങളിലെല്ലാം മാലിന്യ സംസ്‌കരണ സംവിധാനങ്ങള്‍ നിര്‍ബന്ധമായും സ്ഥാപിക്കണമെന്ന് നഗരസഭ നിര്‍ദേശിച്ചിട്ടുണ്ട്. നിര്‍ദേശം പാലിക്കാത്ത സ്ഥാപനങ്ങളുടെ ലൈസന്‍സ് ഉള്‍പ്പെടെ റദ്ദാക്കുമെന്നാണ് നഗരസഭാ നിലപാട്.