പാലക്കാട്: വര്‍ഗീയ മുക്ത ഭാരതം, അക്രമരഹിത കേരളം, ജനവിരുദ്ധ സര്‍ക്കാരുകള്‍ക്കെതിരേ എന്ന മുദ്രാവാക്യമുയര്‍ത്തി മുസ്‌ലിം യൂത്ത് ലീഗ് സംസ്ഥാന പ്രസിഡന്റ് പാണക്കാട് സയ്യിദ് മുനവറലി ശിഹാബ് തങ്ങള്‍ നയിക്കുന്ന യുവജനയാത്ര നാളെയും 11നും ജില്ലയില്‍ പ്രയാണം നടത്തുമെന്ന് ഭാരവാഹികള്‍ അറിയിച്ചു.
10ന് രാവിലെ എട്ടിന് നാട്ടുകല്ലില്‍ നല്‍കുന്ന ആദ്യ സ്വീകരണം സംസ്ഥാന സെക്രട്ടറി കെ.പി.എ മജീദ് ഉദ്ഘാടനം ചെയ്യും. തുടര്‍ന്ന് ആര്യമ്പാവ്, കുമരംപുത്തൂര്‍ ചുങ്കം, മണ്ണാര്‍ക്കാട്, നെല്ലിപ്പുഴ എന്നിവിടങ്ങളിലെ സ്വീകരണങ്ങള്‍ക്കു ശേഷം വൈകിട്ട് ആറിന് ചിറക്കല്‍പടി ജങ്ഷനില്‍ സമാപിക്കും.
11ന് രാവിലെ എട്ടിന് ചെര്‍പ്പുളശ്ശേരിയില്‍നിന്ന് രണ്ടാം ദിവസത്തെ യാത്ര തുടങ്ങും. കരിമ്പുള്ളിയില്‍നിന്ന് 3.30ന് വൈറ്റ് ഗാര്‍ഡ് അംഗങ്ങളുടെ പരേഡ് ആരംഭിക്കും. പേങ്ങാട്ടിരി, വല്ലപ്പുഴ എന്നിവിടങ്ങളിലെ സ്വീകരണത്തിനു ശേഷം വൈകിട്ട് ആറിന് പട്ടാമ്പിയില്‍ സമാപിക്കും. പി.കെ കുഞ്ഞാലിക്കുട്ടി ഉദ്ഘാടനം ചെയ്യും.
കെ.പി.സി.സി വര്‍ക്കിങ് പ്രസിഡന്റ് കെ. സുധാകരന്‍ പങ്കെടുക്കും. സയ്യിദ് മുനവറലി ശിഹാബ് തങ്ങള്‍ ആണ് ജാഥാ ക്യാപ്റ്റന്‍. വാര്‍ത്താസമ്മേളനത്തില്‍ കളത്തില്‍ അബ്ദുല്ല, മരയ്ക്കാര്‍ മാരായമംഗലം, പി.എ തങ്ങള്‍, ഖഫൂര്‍ കോല്‍ക്കളത്തില്‍, എം.എ ഹമീദ്, സി.എ സാഹിദ് പങ്കെടുത്തു.