മാഡ്രിഡ്: മാന്ത്രികനായി മെസ്സി അവതരിച്ചതോടെ കറ്റാലന്‍ ഡെര്‍ബിയില്‍ ബാഴ്‌സലോണക്ക് തകര്‍പ്പന്‍ ജയം. രണ്ട് തകര്‍പ്പന്‍ ഫ്രീകിക്ക് ഗോളുകളും ഒരു അസിസ്റ്റുമായി മെസ്സി കളംനിറഞ്ഞ പോരാട്ടത്തില്‍ എതിരില്ലാത്ത നാല് ഗോളുകള്‍ക്കാണ് ബാഴ്‌സലോണ എസ്പാന്യോളിനെ നിലംപരിശാക്കിയത്. സുവാരസും ഡെംബലെയുമാണ് മറ്റു രണ്ടു ഗോളുകള്‍ നേടിയത്.
ബലന്‍ ഡി ഓര്‍ പുരസ്‌കാര വോട്ടിങില്‍ അഞ്ചാം സ്ഥാനത്തേക്ക് പിന്തള്ളിയവരെ അത്ഭുതപ്പെടുത്തുന്ന പ്രകടനമായിരുന്നു മെസ്സിയുടേത്. മത്സരത്തില്‍ രണ്ട് ഗോളുകള്‍ നേടിയ മെസ്സി ലാലിഗയില്‍ തുടര്‍ച്ചയായി 13 സീസണുകളില്‍ പത്തോ അതിലധികമോ ഗോള്‍ നേടുന്ന താരമായി മാറി. കൂടാതെ ബാഴ്‌സലോണ ഡെര്‍ബിയില്‍ ഏറ്റവും കൂടുതല്‍ ഗോള്‍ (23) നേടുന്ന താരമെന്ന റെക്കോര്‍ഡും മെസ്സിക്ക് സ്വന്തം. 32 മത്സരങ്ങളില്‍ നിന്നാണ് മെസ്സി ഈ നേട്ടം കൈവരിച്ചത്. 2014 മുതലുള്ള കണക്ക് പരിശോധിച്ചാല്‍ യൂറോപ്പിലെ മികച്ച അഞ്ച് ലീഗുകള്‍ പോലും ഡയറക്ട് ഫ്രീകിക്ക് ഗോളുകളില്‍ മെസ്സിക്ക് പിറകിലാണ്. 19 ഡയറക്ട് ഫ്രീകിക്ക് ഗോളുകളാണ് മെസ്സി ഇതുവരെ നേടിയത്.
മത്സരത്തിലുടനീളം നിറഞ്ഞുകളിച്ച മെസ്സി എസ്പാന്യോള്‍ ഗോള്‍മുഖത്ത് നിരന്തരം ഭീഷണി ഉയര്‍ത്തി. 17ാം മിനുട്ടിലാണ് ഫ്രീകിക്കിലൂടെ മെസ്സി ബാഴ്‌സക്ക് ആദ്യ ഗോള്‍ സമ്മാനിച്ചത്. 26ാം മിനുട്ടില്‍ ഡെംബലെ ബോഴ്‌സയുടെ രണ്ടാം ഗോള്‍ നേടി. ഈ ഗോളിന് വഴിയൊരുക്കിയതും മെസ്സി ആയിരുന്നു. 45 ാം മിനുട്ടില്‍ സുവാരസിലൂടെ ബാഴ്‌സ മൂന്നാം ഗോള്‍ നേടി. രണ്ടാം പകുതിയില്‍ എസ്പാന്യോള്‍ പ്രതിരോധം ശക്തിപ്പെടുത്തിയെങ്കലും 65ാം മിനുട്ടില്‍ ഫ്രീകിക്കിലൂടെ മെസ്സി വീണ്ടും വലചലിപ്പിച്ചു. ഇത്തവണ ഗോള്‍കീപ്പറെ കാഴ്ചക്കാരനാക്കി പോസ്റ്റിന്റെ വലതുമൂലയിലാണ് പന്ത് വീണത്. ജയത്തോടെ 31 പോയിന്റുമായി പട്ടികയില്‍ ഒന്നാം സ്ഥാനത്താണ് ബാഴ്‌സലോണ. രണ്ടാം സ്ഥാനത്തുള്ള സെവിയ്യക്ക് 28 പോയിന്റാണുള്ളത്. മറ്റൊരു മത്സരത്തില്‍ ഐബര്‍ ലെവാന്റെയുമായി 4-4 സമനിലയില്‍ പിരിഞ്ഞു.