കോഴിക്കോട്: മേമുണ്ട സ്‌കൂള്‍ അധികൃതര്‍ കലോത്സവത്തില്‍നിന്ന് പിന്‍വലിച്ച 'കിതാബ് 'എന്ന നാടകത്തിന് പിന്തുണ പ്രഖ്യാപിച്ച് സാംസ്‌കാരിക പ്രവര്‍ത്തകരുടേതായി വന്ന കുറിപ്പില്‍ താന്‍ നല്‍കിയ പിന്തുണ പിന്‍വലിക്കുന്നതായി കവി കല്‍പറ്റ നാരായണന്‍.
നാടകം രചിക്കാന്‍ സംവിധായകന്‍ ആസ്പദമാക്കിയ 'വാങ്ക് 'എന്ന കഥയുടെ രചയിതാവായ ആര്‍. ഉണ്ണിയോട് സംസാരിച്ച ശേഷമാണ് ഈ കാര്യം പറയുന്നതെന്നും കല്‍പറ്റ നാരായണന്‍ വിശദീകരിച്ചു.
ചില സാംസ്‌കാരിക പ്രവര്‍ത്തകര്‍ തയാറാക്കിയ പ്രതിഷേധക്കുറിപ്പില്‍ തന്റെ പേര് ചേര്‍ത്തത് തെറ്റിദ്ധാരണയുടെ പുറത്താണെന്നും കാര്യം വ്യക്തമായപ്പോള്‍ പിന്തുണ പിന്‍വലിക്കുകയാണെന്നും കല്‍പറ്റ നാരായണന്‍ ഫേസ്ബുക്കില്‍ വ്യക്തമാക്കി. പ്രതിഷേധക്കുറിപ്പില്‍ പേര് ചേര്‍ത്ത് പ്രചരിപ്പിക്കാന്‍ അഭ്യര്‍ഥിക്കുന്ന പോസ്റ്റിന് താഴെ കമന്റായാണ് കവി നിലപാട് വ്യക്തമാക്കിയത്.
'ഇതില്‍ എന്റെ പേര് വന്നത് ഒരു തെറ്റിദ്ധാരണ മൂലമാണ്. ആര്‍. ഉണ്ണിയോടന്വേഷിച്ചപ്പോഴാണ് നിജസ്ഥിതി അറിഞ്ഞത്. ഉണ്ണിയെ അവിശ്വസിക്കാന്‍ കാരണമില്ല. എന്റെ പിന്തുണ പിന്‍വലിക്കുന്നു' എന്നാണ് കല്‍പറ്റ നാരായണന്‍ ഫേസ്ബുക്കില്‍ പറഞ്ഞിരിക്കുന്നത്. എഴുത്തുകാരി ശാരദക്കുട്ടി ഫേസ്ബുക്കില്‍ പോസ്റ്റ് ചെയ്ത പ്രസ്താവനക്ക് താഴെയായിരുന്നു കല്‍പറ്റ നാരായണന്‍ കമന്റായി ഈ കാര്യം വ്യക്തമാക്കിയത്.
നവോത്ഥാന മൂല്യങ്ങള്‍ക്കും ആവിഷ്‌കാര സ്വാതന്ത്ര്യത്തിനും എതിരേയുള്ള കടന്നുകയറ്റമാണ് കിതാബിനുനേരെ ഉണ്ടായിട്ടുള്ളതെന്നും അതുകൊണ്ടുതന്നെ സംസ്ഥാന സ്‌കൂള്‍ കലോത്സവത്തില്‍ നാടകം അവതരിപ്പിക്കുന്നതിന് അവസരം ലഭിക്കാത്തതില്‍ പ്രതിഷേധം അറിയിക്കുന്നു എന്നുമാണ് ഇരുനൂറോളം പേര്‍ ഒപ്പുവച്ച പ്രസ്താവനയില്‍ പറഞ്ഞിരുന്നത്.ഇസ്‌ലാമിനെ വികൃതമായി ചിത്രീകരിക്കുന്ന നാടകം കോഴിക്കോട് ജില്ലാ സ്‌കൂള്‍ കലോത്സവത്തില്‍ അവതരിപ്പിക്കുകയും ഒന്നാം സ്ഥാനം ലഭിക്കുകയും ചെയ്തിരുന്നു. എന്നാല്‍ പ്രതിഷേധം ശക്തമായതോടെ നാടകം അവതരിപ്പിക്കേണ്ടതില്ലെന്ന് സ്‌കൂള്‍ അധികൃതര്‍ തീരുമാനിക്കുകയായിരുന്നു. നാടകം അവതരിപ്പിക്കണമെന്നാവശ്യപ്പെട്ട് കോടതിയെ സമീപിച്ചെങ്കിലും കോടതി അനുമതി നല്‍കിയിരുന്നില്ല.