കല്‍പ്പറ്റ: കാടുകളുമായി അതിര്‍ത്തി പങ്കിടുന്ന വയനാടന്‍ ഗ്രാമങ്ങളില്‍ ഇപ്പോള്‍ കേള്‍ക്കാനാവുന്നത് കര്‍ഷകരുടെ വിലാപങ്ങള്‍ മാത്രം. കാലാവസ്ഥ കൈവിട്ടതിനൊപ്പം വന്യമൃഗങ്ങള്‍ കാടിറങ്ങുക കൂടി ചെയ്തതോടെയാണ് കര്‍ഷകര്‍ തീരാദുരിതത്തിലായത്. കഴിഞ്ഞ കുറച്ചുദിവസങ്ങള്‍ക്കുള്ളില്‍ ജില്ലയില്‍ മഴ കനിയാത്തത് കാരണം കൃഷിയിറക്കാനവാതെ നിരവധി കര്‍ഷകര്‍ ദുരിതത്തിലായി.ഇറക്കിയവരാവട്ടെ കൃഷിക്ക് ആവശ്യത്തിന് വെള്ളം കിട്ടാതെയും ദുരിതമനുഭവിക്കുകയാണ്. മഴ കനിയാതായതോടെ അരണപ്പാറയില്‍ 120 ഏക്കര്‍ കൃഷിയാണ് വരണ്ടുണങ്ങിയത്. ഇതിനിടെ കര്‍ഷകര്‍ക്ക് സഹായകമായി പ്രഖ്യാപിച്ച ജലസേചന പദ്ധതികളില്‍ പലതും പാതിവഴിയില്‍ നില്‍ക്കുന്നതും കര്‍ഷകര്‍ക്ക് തിരിച്ചടിയായിരിക്കുകയാണ്. ഇതില്‍ പലമേഖലകൡ നിന്നു പ്രതിഷേധങ്ങള്‍ ഉയര്‍ന്നു തുടങ്ങിയിട്ടുണ്ട്. ഇതിനിടക്കാണ് കൂനിന്‍മേല്‍കുരു പോലെ വന്യമൃഗങ്ങളുടെ കാടിറക്കം. കഴിഞ്ഞദിവസം പയ്യംപള്ളിയില്‍ കാടിറങ്ങിയ കൊമ്പന്‍ നിരവധി കൃഷിയാണ് തകര്‍ത്തത്. ആനയുടെ ആക്രമണത്തില്‍ മൂന്നുപേര്‍ക്ക് പരുക്കേല്‍ക്കുകയും ചെയ്തു. നടവയല്‍ പേരൂര്‍ പാടശേഖരത്തില്‍ വിത്തിറക്കിയ കര്‍ഷകരെ കണ്ണീരിലാഴ്ത്തിയാണ് കാട്ടാനക്കൂട്ടം തോരോട്ടം നടത്തിയത്്.