മുക്കം: മുക്കത്ത് പ്ലസ് ടു വിദ്യാര്‍ഥിനി വീടിനുള്ളില്‍ മരിച്ച നിലയില്‍ കണ്ടെത്തിയ സംഭവത്തില്‍ പൊലിസ് നിരീക്ഷണത്തിലായിരുന്ന യുവാവ് അറസ്റ്റില്‍. മുരിങ്ങം പുറായി സ്വദേശി റിനാസ് ആണ് അറസ്റ്റിലായത്. 306 ാം വകുപ്പ് പ്രകാരം ആത്മഹത്യ പ്രേരണ കുറ്റത്തിനാണ് അറസ്റ്റ് ചെയ്തത്.

പെണ്‍കുട്ടിയുടെ മരണത്തിനിടയാക്കിയത് ഇയാളുടെ കുടുംബത്തിന്റെ ഭീഷണിമൂലമാണെന്നാണ് ആരോപണം. മരിച്ച പെണ്‍കുട്ടിയുടെ കുടംബത്തിന്റെ ആരോപണം ശരിവെക്കുകയായിരുന്നു സഹപാഠികളും. ഈ സാഹചര്യത്തിലാണ് കാമുകനെ പൊലിസ് കസ്റ്റഡിയിലെടുത്തത്. ഇയാളുടെ മൊബൈല്‍ ഫോണ്‍ പരിശോധിക്കുകയാണിപ്പോള്‍ പൊലിസ്.

സ്‌കൂള്‍ വിട്ടു വന്ന ശേഷമാണ് വീട്ടില്‍ അനുപ്രിയയെ ആത്മഹത്യ ചെയ്ത നിലയില്‍ കണ്ടെത്തിയത്. മരിക്കുന്നതിന്റെ തലേന്ന് യുവാവുമായി പെണ്‍കുട്ടി പുറത്ത് പോയിരുന്നു. ഇതിനുപുറമേ യുവാവിന്റെ വീട്ടുകാര്‍ നിരന്തരം ഫോണിലൂടെ ഭീഷണിപ്പെടുത്തിയിരുന്നതായും ഇതില്‍ പെണ്‍കുട്ടി മാനസികപ്രയാസം നേരിട്ടിരുന്നതായും സഹപാഠികള്‍ പറയുന്നു. മതം മാറുന്നതിനെ കുറിച്ച് തങ്ങളോട് പറയാറുണ്ടായിരുന്നെന്നും ഇനി യുവാവുമായി ബന്ധത്തിനില്ലെന്ന് പെണ്‍കുട്ടി പറഞ്ഞിരുന്നതായും സഹപാഠികള്‍ പറഞ്ഞു.