ന്യൂഡല്‍ഹി: നിര്‍ഭയ കൂട്ടബലാത്സംഗ കേസിലെ പ്രതികളില്‍ ഒരാളുടെ പുനഃപരിശോധനാ ഹരജി പരിഗണിക്കുന്നതില്‍ നിന്നും സുപ്രിം കോടതി ചീഫ് ജസ്റ്റിസ് എസ്.എ ബോബ്‌ഡെ പിന്‍മാറി. കേസിലെ ഒരു പ്രതിയായ അക്ഷയ് സിങ് ആണ് വധശിക്ഷക്കെതിരായ പുനഃപരിശോധനാ ഹരജി നല്‍കിയത്. എന്നാല്‍ തന്റെ കുടുംബാംഗമായ അഭിഭാഷകന്‍ ഇരയുടെ കുടുംബത്തിന് വേണ്ടി ഹാജരാകുന്നു എന്ന കാരണത്താലാണ് പിന്‍മാറ്റമെന്നാണ് ലഭിക്കുന്ന സൂചന.

അതേസമയം ഹരജി പരിഗണിക്കാന്‍ പുതിയ ബെഞ്ച് രൂപീകരിക്കും. ചീഫ് ജസ്റ്റിസിന് പുറമേ ജസ്റ്റിസ് ആര്‍. ഭാനുമതി, അശോക് ഭൂഷണ്‍ എന്നിവരാണ് ഇന്ന് ഹരജി പരിഗണിക്കാനിരുന്നത്. 2012 ഡിസംബര്‍ 16നാണ് പാരാമെഡിക്കല്‍ വിദ്യാര്‍ഥിനിയായ 23കാരി യാത്ര ചെയ്യുകയായിരുന്ന ബസ്സില്‍ വച്ച് മൃഗീയമായി ബലാത്സംഗം ചെയ്യപ്പെട്ടത്. പിന്നീട് ഇവരെ ക്രൂരമായി അക്രമിക്കുകയും ചെയ്തു. തുടര്‍ന്ന് രണ്ടാഴ്ചക്ക് ശേഷം മരിക്കുകയും ചെയ്തു. ആറ് പേരായിരുന്നു കേസില്‍ പ്രതികളായി ഉണ്ടായിരുന്നത്.