ചാവക്കാട്: ഓട്ടോറിക്ഷയില്‍ വില്‍പ്പനക്കായി കൊണ്ടുവന്ന 1350 നിരോധിക പുകയില ഉല്‍പ്പന്ന പാക്കറ്റുകളുമായി യുവാവിനെ അറസ്റ്റു ചെയ്തു. തിരുവത്ര അമ്പലത്ത് വീട്ടില്‍ വഹാബി(42)നെയാണ് ചാവക്കാട് എസ്.ഐ. കെ.ജി.ജയപ്രദീപിന്റെ നേതൃത്വത്തിലുള്ള സംഘം അറസ്റ്റു ചെയ്തത്.
ചൊവ്വാഴ്ച വൈകിട്ട് തിരുവത്ര ചെങ്കോട്ടയില്‍ നിന്നാണ് ഇയാളെ പിടികൂടിയത്. പൊലിസിന്റെ വാഹന പരിശോധനക്കിടെ സംശയകരമായ സാഹചര്യത്തില്‍ റോഡുവക്കില്‍ നിര്‍ത്തിയിട്ടിരുന്ന ഓട്ടോറിക്ഷ പരിശോധിച്ചപ്പോഴാണ് നിരോധിത പുകയില ഉല്‍പ്പന്നങ്ങളോടെ ഇയാള്‍ പിടിയിലായത്. പുകയില ഉല്‍പ്പന്നങ്ങള്‍ ഓട്ടോറിക്ഷയിലെത്തിച്ച് ആവശ്യക്കാര്‍ക്ക് വിതരണം ചെയ്യുന്നതിനിടെയാണ് ഓട്ടോറിക്ഷ ഡ്രൈവര്‍ കൂടിയായ ഇയാള്‍ പിടിയിലായതെന്ന് പൊലിസ് പറഞ്ഞു. ഓട്ടോറിക്ഷയില്‍ ഒരു ട്രോളി ബാഗിനുള്ളില്‍ ഒളിപ്പിച്ച നിലയിലാണ് പുകയില ഉല്‍പ്പന്നങ്ങള്‍ കണ്ടെത്തിയത്.