കാളികാവ്: നിലമ്പൂര്‍ മേഖലയില്‍ മാവോയിസ്റ്റുകള്‍ സായുധ പോരാട്ടത്തിനു തയാറെടുക്കുന്നതായി സൂചന. കഴിഞ്ഞ നവംബര്‍ 24നു മേഖലയിലുണ്ടായ പരാജയത്തിനു മാവോയിസ്റ്റുകള്‍ തിരിച്ചടിക്കാന്‍ സാധ്യതയുണ്ടെന്നു കേന്ദ്ര ഇന്റലിജന്‍സ് മുന്നറിയിപ്പ് നല്‍കി.

മാവോയിസ്റ്റ് കേന്ദ്ര കമ്മിറ്റി അംഗവും പശ്ചിമഘട്ട മേഖലാ സെക്രട്ടറിയുമായിരുന്ന കുപ്പു ദേവരാജും അജിതയും 2016 നവംബര്‍ 24നാണ് പൊലിസ് വെടിവയ്പില്‍ കൊല്ലപ്പെട്ടിരുന്നത്. ഒരു വര്‍ഷം തികയുംമുന്‍പ് ഇരുവരുടേയും കൊലയാളികളെ ശിക്ഷിക്കുമെന്ന നിലപാടിലാണ് മാവോയിസ്റ്റുകള്‍. ഇന്റലിജന്‍സ് റിപ്പോര്‍ട്ട് ശരിവയ്ക്കുന്നതരത്തില്‍ മാവോവാദി പ്രവര്‍ത്തനം സംസ്ഥാനത്തു ശക്തമായതോടെ ഏറ്റുമുട്ടല്‍ സാധ്യത കണക്കിലെടുത്തു കരുതലോടെയാണ് പൊലിസ് നീങ്ങുന്നത്.