റിയാദ്: സഊദിയില്‍ ഇന്നലെയുണ്ടായ വാഹനാപകടത്തില്‍ നാല് ഇന്ത്യക്കാര്‍ മരിച്ചു.
ഉത്തര്‍ പ്രദേശ് സ്വദേശികളായ ഷൗക്കത്ത് അലി, ബൈരിലാല്‍ ശിവ് ബാലക്, രാജസ്ഥാന്‍ സ്വദേശി ഗീവര്‍ദാലി ചന്ദ്, മുംബൈ സ്വദേശി ഫൈദ ഹുസ്സൈന്‍ സിദ്ദീഖി എന്നിവരാണ് ത്വാഇഫില്‍ ബുധനാഴ്ച രാവിലെ ഏഴു മണിക്കുണ്ടായ വാഹനാപകടത്തില്‍ മരിച്ചത്.
ത്വാഇഫില്‍ നിന്ന് സെയില്‍ വഴി മക്കയിലേക്കുള്ള റോഡില്‍ ശറഫിയ എന്ന സ്ഥലത്തുവെച്ച് ഇവര്‍ സഞ്ചരിച്ച വാഹനത്തില്‍ അതിവേഗത്തില്‍ വന്ന സ്വദേശി യുവാവിന്റെ കാര്‍ വന്നിടിക്കുകയായിരുന്നു. ഇടിയുടെ ആഘാതത്തില്‍ റോഡ് ഡിവൈഡറില്‍ തട്ടി മറിഞ്ഞ് ഇവര്‍ അപകടസ്ഥലത്തുവെച്ചു തന്നെ മരിക്കുകയായിരുന്നു.
നെസ്മ കമ്പനി ജീവനക്കാരായ 24 പേരാണ് വാഹനത്തില്‍ ഉണ്ടായിരുന്നത്.
കാറോടിച്ച യുവാവിന്റെയും മറ്റു രണ്ട് ഇന്ത്യക്കാരുടെയും നില ഗുരുതരമാണ്. അപകടത്തില്‍ പരുക്കേറ്റവരെ കിങ് അബ്ദുല്‍ അസീസ് ആശുപത്രിയില്‍ പ്രവേശിപ്പിച്ചു.