പാപ്പിനിശ്ശേരി: പാപ്പിനിശ്ശേരി മേല്‍പ്പാലത്തിന്റെ ഇരുവശത്തുമുള്ള ജങ്ഷനുകളിലെ വളവുകള്‍ അപകടക്കെണിയാകുന്നു. 

കാട്ടിലെപള്ളിക്ക് സമീപം എം.എം ഹോസ്പിറ്റലിലേക്ക് പോകുന്ന സര്‍വിസ് റോഡ്, ഹാജി റോഡിന് സമീപത്തെ കെ.എസ്.ഇ.ബി സര്‍വിസ് റോഡ്, ബോട്ട്‌ജെട്ടി ഭാഗത്തേക്ക് പോകുന്ന റോഡ് എന്നിവിടങ്ങളിലെ വളവുകളിലാണ് ഡ്രൈവര്‍മാരുടെ അശ്രദ്ധ മൂലം അപകടമുണ്ടാകുന്നത്. പാലത്തിന്റെ ഇരുവശത്തുമുള്ള രണ്ട് സര്‍വിസ് റോഡുകളില്‍ നിന്നു വരുന്ന വാഹനങ്ങള്‍ പാലത്തിലേക്ക് പെട്ടെന്ന് പ്രവേശിക്കുന്നത് മൂലമാണ് അപകടം ഉണ്ടാകുന്നത്. അമിത വേഗതയിലാണ് വാഹനങ്ങള്‍ ഇതുവഴി പോകുന്നത്. ഈ ഭാഗങ്ങളില്‍ പലപ്രാവശ്യം അപകടങ്ങള്‍ ഉണ്ടായിട്ടുണ്ടെങ്കിലും അധികൃതര്‍ ഇക്കാര്യത്തില്‍ അവഗണന തുടരുകയാണ്.
ഹാജി റോഡിന് സമീപം പാലത്തിന്റെ അവസാന ഭാഗത്ത് ബോട്ട്‌ജെട്ടി ഭാഗത്തേക്ക് പോകുന്ന റോഡില്‍ പാലത്തിന്റെ ഇരുവശത്ത് നിന്നു അമിത വേഗതയില്‍ വാഹനങ്ങള്‍ കടന്ന് പോകുന്നതും അപകട സാധ്യതയുണ്ടാക്കുന്നു. കണ്ണൂര്‍-പഴയങ്ങാടി ഭാഗങ്ങളിലേക്ക് ബസുകളടക്കം ദിനംപ്രതി നിരവധി വാഹനങ്ങളാണ് റോഡ് വഴി കടന്ന് പോകുന്നത്. കാട്ടിലെപള്ളി ഭാഗത്തെ ഗവ.മാപ്പിള എല്‍.പി സ്‌കൂള്‍, ഹിദായത്ത് ഇംഗ്ലീഷ് മീഡിയം ഹൈസ്‌കൂള്‍, ഹാജി റോഡ് ഭാഗത്തെ ഇ.എം.എസ് ഗവ.ഹയര്‍ സെക്കന്‍ഡറി സ്‌കൂള്‍ എന്നീ ഭാഗങ്ങളില്‍ ഡിവൈഡറുകള്‍ സ്ഥാപിക്കാത്തതിനാല്‍ വാഹനങ്ങള്‍ പലപ്പോഴും അമിത വേഗതയിലായിരിക്കും.
പാലത്തിന്റെ ഇരുവശങ്ങളിലുമുളള അപകട വളവുകളും കെ.എസ്.ടി.പി റോഡിലേക്ക് പ്രവേശിക്കുന്ന റോഡുകളുമുള്ള ഭാഗത്ത് സൂചന ബോര്‍ഡുകളോ ഡിവൈഡറുകളോ സ്ഥാപിക്കണമെന്നാണ് ജനങ്ങളുടെയും സ്‌കൂള്‍ അധികൃതരുടെയും ആവശ്യം.