പുതുനഗരം : നന്ദിയോട് സാമൂഹ്യ ആരോഗ്യകേന്ദ്രത്തില്‍ അത്യാഹിതവിഭാഗം മുഴുസമയവും പ്രവര്‍ത്തിക്കണമെന്ന ആവശ്യം ശക്തമായി. നിരവധി വാഹന അപകടങ്ങള്‍ ഉണ്ടാകുന്ന മേഖലയിലെ ഏക സര്‍ക്കാര്‍ ആശുപത്രിയില്‍ അത്യഹിതവിഭാഗം ഉച്ചക്കു രണ്ടുമണിവരെമാത്രമാണ് പ്രവര്‍ത്തിക്കുന്നത്. മറ്റു സമയങ്ങളില്‍ ഡോക്ടര്‍മാര്‍ ആശുപത്രിയിലുണ്ടാകാത്ത അവസ്ഥയും ഉണ്ട്. മൂന്ന് ഡോക്ടര്‍മാരുള്ള ആശുപത്രിയില്‍ 24 മണിക്കൂറും കിടത്തിചികില്‍സ ആരംഭിച്ചിട്ടുണ്ടെന്ന് അറിയിച്ചെങ്കിലും രോഗികളെ പകല്‍സമയത്തുമാത്രമേ വാര്‍ഡുകളില്‍ അനുവദിക്കാറുള്ളൂ എന്ന് നാട്ടുകാര്‍ പറയുന്നു. ദിനംപ്രതി നാന്നൂറിലധികം രോഗികള്‍ എത്തുന്ന നന്ദിയോട്ടെ സാമൂഹ്യ ആരോഗ്യകേന്ദ്രത്തില്‍ കിടത്തിചികില്‍സ പൂര്‍ണ്ണമായും നടപ്പിലാക്കുകയും അത്യഹിതവിഭാഗം 24 മണിക്കൂറും പ്രവര്‍ത്തിപ്പിക്കുവാന്‍ വേണ്ട നടപടികള്‍ സര്‍ക്കാര്‍ സ്വീകരിക്കണമെന്നാണ് നാട്ടുകാരുടെ ആവശ്യം.